Իր կամքից անկախ չի դարձել եղբայրասպան
Հայաստանի շատ բնակիչների մոտ դեռ կա ապօրինի ձեռք բերված զենք-զինամթերքի մեծ քանակություն: Դրանք որքան էլ «քնած» մնան, սովորաբար ուշ թե շուտ գործածվում են ըստ իրենց նպատակային նշանակության` կրակելու համար, ինչպես մայրաքաղաքի բնակիչներից մեկի «ԱԿ» տեսակի ինքնաձիգը:
Երևանի Նոր Նորքի 5-րդ զանգվածի Միկոյան փողոցի թիվ 17 շենքի 35-րդ բնակարանի բնակիչ, 1978 թ. ծնված Գրիգոր Մանուկյանին ՀՀ քրեական օրենսգրքի 34-104 և 235-րդ հոդվածների 1-ին մասերով մեղադրանք է առաջադրվել այն բանի համար, որ նա 2011թ. դեկտեմբերի 28-ին, ժամը 09:00-ի սահմաններում Նոր Նորքի 5-րդ զանգվածի Միկոյան փողոցի 4-րդ շենքի 18 բնակարանում, գործով չպարզված հանգամանքներում, իր կողմից ապօրինի ձեռք բերած հրազեն հանդիսացող «ԱԿ» տեսակի 7,62մմ տրամաչափի ինքնաձիգից սպանելու դիտավորությամբ կրակահերթ է արձակել եղբոր` Գագիկ Մանուկյանի ուղղությամբ: Սակայն, ըստ մեղադրական եզրակացության, իր կամքից անկախ հանգամանքներից ելնելով, նա չի կարողացել հանցագործությունն ավարտին հասցնել:
Գ. Մանուկյանի նկատմամբ որպես խափանման միջոց ընտրված է կալանավորումը: Տվյալ քրեական գործով դատավարությունն այժմ ընթանում է Երևանի Ավան և Նոր-Նորք վարչական շրջանների ընդհանուր իրավասության դատարանում՝ դատավոր Դավիթ Հարությունյանի նախագահությամբ:
