Նախագահի ընտրություններին ընտրողների թիվը կավելանա՞
Հայաստանի նախագահի ընտրություններին ավելի մեծ թվով մարդիկ կընդգրվեն ընտրացուցակներում, քան վերջին խորհրդարանական ընտրությունների ժամանակ: «Ազատություն» ռադիոկայանի հետ զրույցում նման համոզմունք է հայտնել Ոստիկանության անձնագրային և վիզաների վարչության պետ Հովհաննես Քոչարյանը` առայժմ ձեռնպահ մնալով կոնկրետ թվեր նշելուց:
«Ես կարծում եմ, որ այդ աճի միտումները, որոնք ընտրությունից ընտրություն նկատվել են, կպահպանվեն նաև այս 9 ամսվա կտրվածքով: Չեմ տեսնում, թե ինչի հաշվին պետք է նվազի»,- ասել է նա նա:
Խորհրդարանի ընտրություններին ընդառաջ Անձնագրային և վիզաների վարչության պետը հայտարարել էր, թե Հայաստանում կա 2 միլիոն 485 հազարից ավելի ընտրող` 360 հազարով ավելի, քան 2008 թվականի ընտրացուցակներում: Իսկ փետրվարի սկզբին Ազգային վիճակագրական ծառայությունը հրապարակել էր մարդահամարի նախնական տվյալները, որոնց համաձայն Հայաստանում բնակչության թիվը 2 միլիոն 870 հազար է:
Եվ դեռ 9 ամիս առաջ կային դժգոհություններ, որ ընտրողների թիվն աճում է բնակչության թվի նվազման պայմաններում: Միջազգային կառույցները ԱԺ վերջին ընտրությունների կապակցությամբ իրենց զեկույցներում արձանագրել էին ոչ կառավարական կազմակերպությունների բողոքները արտագաղթի պարագայում ընտրողների թվի ավելացման կապակցությամբ:
Մայիսին կայացած խորհրդարանի ընտրություններից հետո էլ, ըստ վիճակագրության, Հայաստանից մեկնած և չվերադարձածների թիվը շարունակում է անշեղորեն աճել: Բայց այս ամենով հանդերձ, ձևավորվող ընտրացուցակներում, ըստ Հովհաննես Քոչարյանի, կավելանան հազարավոր նոր անուններ:
Անձնագրային և վիզաների վարչության պետը ընտրողների թվի ավելացման հանգամանքը բացատրում է պետական ռեգիստրը վարելու կարգով. «Հայաստանից դուրս գտնվողները զանգվածային դիմումներ չեն ներկայացնում, որ հաշվառումից իրենց հանենք: Ցուցակներում կամ ռեգիստրում տվյալների ամրագրումը պայմանավորված է հենց անձի կամքով: Այսինքն` եթե անձը տեղյակ չի պահում իր գնալու մասին, մենք ինչպե՞ս կարող ենք անել»:
Նրա խոսքով, անգամ այն անձինք, ովքեր ըստ 2012 թվականի հունիսի 1-ից ուժի մեջ մտած «Վարչական իրավախախտումների մասին» օրենքի համապատասխան դրույթի պահանջով (6 ամիս առանց համապատասխան մարմիններին տեղեկացնելու երկրից բացակայելու դեպքում) կենթարկվեն 3 հազար դրամ տուգանքի, դուրս չեն հանվի ընտրողների ցուցակից. «Որովհետև այդ մարդիկ լինելու են Հայաստանում… (Դրսում լինելու պարագայում էլ) Չենք հանելու, որովհետև այդ տվյալին մենք չենք տիրապետելու»:
Հարցին, թե ի՞նչ նոր տվյալներ են ավելացել, Քոչարյանը պատասխանել է. «Չմոռանանք, որ բազմաթիվ 18 տարին լրացած անձինք մտնում են ռեգիստր, դառնում են ընտրողներ: Մի մոռացեք, որ բազմաթիվ մեր հայրենակիցներ ձեռք են բերել ՀՀ քաղաքացիություն, հատկապես սիրիահայերը, վրացահայերը: Նշեմ, որ 2012 թվականին 14 հազար 239 մարդ ստացել է ՀՀ քաղաքացիություն. 6461 մարդ` Վրաստանի քաղաքացիներ, 4465-ը` Սիրիայի քաղաքացիներ»:
