«Սիվիլիթասի» բողոքը մերժվեց
Այսօր Երևանի վերաքննիչ քրեական դատարանը մերժեց «Սիվիլիթաս» հիմնադրամի ներկայացուցիչ Արթուր Գրիգորյանի բողոքը։ Դատավոր Հենրիկ Տեր-Ադամյանը նշեց, որ Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը որոշումը կայացրել է Հայաստանի Հանրապետության օրենսդրության համաձայն, հետևաբար, Արթուր Գրիգորյանի բողոքը պետք է մերժել։
Հիշեցնենք, որ «Սիվիլիթաս» հիմնադրամի ներկայացուցիչ Արթուր Գրիգորյանը բողոք էր ներկայացրել Վերաքննիչ քրեական դատարան` խնդրելով բեկանել Կենտրոն և Նորք-Մարաշ վարչական շրջանների ընդհանուր իրավասության դատարանի որոշումը։ Նշենք, որ վերջինս օգոստոսի 18-ին մերժել էր փաստաբանի դիմումը և չէր վերացրել հանցավոր ճանապարհով ստացված առանձնապես խոշոր չափերով եկամուտներն օրինականացնելու (փողերի լվացում) դեպքով Ազգային անվտանգության ծառայության կողմից քրեական գործ հարուցելու մասին որոշումը։
