Վրաստանի պաշտպանության նախարարը հանդիպել է ՆԱՏՕ-ի գլխավոր քարտուղարի տեղակալին
Վրաստանի պաշտպանության նախարար Դմիտրի Շաշկինն ընդունել է ՆԱՏՕ-ի գլխավոր քարտուղարի՝ գործողությունների գծով տեղակալ Ստեֆան Էվանսին. հաղորդում է apsny.ge-ն: Հանդիպման ժամանակ կողմերի քննարկման գլխավոր թեման Աֆղանստանում տարվող խաղաղապահ առաքելությանը Վրաստանի մասնակցության հարցն է եղել:
Հանդիպման ժամանակ Դմիտրի Շաշկինը հայտարարել է, որ Վրաստանի համար կարևոր է այդ առաքելությունում վրացական խաղաղապահ կոնտինգենտի մասնակցությունը և համաշխարհային կայունության ու անվտանգության ապահովման գործընթացում սեփական ներդրումն ունենալը:
Շաշկինը հավելել է, որ տվյալ առաքելությանը մասնակցելով վրացական զորամիավորումները ձեռք են բերում կարևորագույն փորձ, ինչը հանգեցնում է վրացական բանակի ուժեղացմանը: Շաշկինը Աֆղանստանում տարվող խաղաղապահ առաքելությանը Վրաստանի մասնակցությունը կարևորել է նաև ՆԱՏՕ-ին Վրաստանի ինտեգրման տեսանկյունից:
