Ադրբեջանցի խորհրդարանականը առաջարկել է ստեղծել թուրք-ադրբեջանական զորամիավորումներ
Այսօր տեղի է ունեցել Ադրբեջանի խորհրդարանի՝ անվտանգության ու պաշտպանության հանձնաժողովի հերթական նիստը, որում առաջարկվել է ստեղծել թուրք-ադրբեջանական զինված ստորաբաժանումներ: Այս մասին, ըստ ադրբեջանական Trend լրատվական գործակալության՝ հայտարարել է այդ հանձնաժողովի անդամ, պատգամավոր Զահիդ Օրուջը:
Վերջինիս խոսքերով՝ ջոկատի, գնդի և այլ ստորաբաժանման տեսքով ստեղծվելիք այդ զորամիավորումները կարող են զորավարժություններ անցկացնել. «Հանձնաժողովի անդամները նկատել են, որ զորամիավորումների ստեղծումն իրականացվելու է առանց նոր օրենքի ընդունման, 2011թ. հունվարի 19-ից գործող օրենքի հիման վրա, որով հաստատվեց Ադրբեջանի ու Թուրքիայի միջև ռազմավարական գործընկերության ու փոխադարձ օգնության մասին պայմանագիրը»:
2010թ. օգոստոսի 16-ին Թուրքիայի ու Ադրբեջանի նախագահներ Աբդուլլահ Գյուլի և Իլհամ Ալիևի ստորագրած պայմանագիրը ներառում է հետևյալ հոդվածները. «Ռազմա-քաղաքական հարցեր և անվտանգության հարցեր», «Ռազմական ու ռազմա-տեխնիկական համագործակցության հարցեր», «Հումանիտար հարցեր», «Ընդհանուր և ամփոփիչ դրույթներ»՝ ընդհանուր առմամբ 23 հոդված:
