ՄԱԿ-ի և Արաբական երկրների լիգայի հատուկ բանագնացը կայցելի Ռուսաստան և Չինաստան
Սիրիայի հարցով ՄԱԿ-ի և Արաբական երկրների լիգայի (ԱԵԼ) հատուկ բանագնաց Լահդար Բրահիմին կայցելի Ռուսաստան և Չինաստան՝ երկու երկրների առաջնորդների հետ Սիրիայում տիրող իրավիճակը քննարկելու նպատակով։ Այս մասին, vz.ru-ի փոխանցմամբ, նա հայտարարել է ՄԱԿ-ի շտաբ – բնակարանում լրագրողների հետ հանդիպման ժամանակ։
«Ես Ռուսաստան և Չինաստան այցի հրավեր ունեմ, և սիրով կմեկնեմ այնտեղ»,- ասել է Բրահիմին՝ ընդգծելով, որ այցերի հետ կապված որոշակի սպասելիքներ ունի։
Մոսկվան ու Պեկինը 3 անգամ արգելափակել են ՄԱԿ-ի Անվտանգության խորհրդում Սիրիայի վերաբերյալ բանաձևերը։ Դամասկոսի վրա ճնշում գործադրելու անհրաժեշտության մասին համառում են արևմտյան երկրները՝ ԱՄՆ-ի ու Ֆրանսիայի գլխավորությամբ։ Նրանք վստահ են, որ եթե Ռուսաստանն ու Չինաստանը միանան այդ բանաձևերին, որը նախատեսում է նաև նախագահ Բաշար ալ Ասադի հրաժարականը, ապա դա դրական ազդեցություն կունենա խնդրի կարգավորման վրա։
Բրահիմին երկուշաբթի ՄԱԿ-ի Անվտանգության խորհրդի նիստում ներկայացրել է Սիրիա կատարած 10-օրյա այցի արդյունքները։ Նա խոստովանել է, որ իրավիճակը երկրում շատ խրթին է, իսկ կարգավորմանն ուղղված ջանքերը փակուղի են մտել։
