Հունական խոշորագույն բանտում ապստամբություն է սկսվել
Աթենքի Կորիդալոս թաղամասում գտնվող հունական խոշորագույն բանտում սեպտեմբերի 23-ին ապստամբություն է սկսվել:
Բանտարկյալները զբոսանքից հետո հրաժարվել են վերադառնալ իրենց խցերը, այրել են սպիտակեղենը եւ հագուստը, ճաղերից քարեր են նետել փողոց: Ներկայումս ընդվզում է միայն մեկ միջանցք, այն շրջափակել են ոստիկանական հատուկ նշանակության ջոկատները, հայտնում է «Մոսկովսկի կոմսոմոլեցը»:
Ըստ ոստիկանության` անկարգությունները կարող են հրահրած լինել մահմեդական բանտարկյալները, որոնք բողոքում են համացանցում հայտնված «Մահմեդականների անմեղությունը» ֆիլմի դեմ: Ըստ այլ վարկածի` բանտարկյալները բողոքում են նեղ խցիկներում առկա պայմանների դեմ:
Ինչպես հաղորդում է «Ռոսբալտը», սեպտեմբերի 23-ին ավելի վաղ ոստիկանությունը ձերբակալել էր 600 ցուցարարներից 40 մարդու, որոնք փորձում էին գնալ Աթնքում ԱՄՆ-ի դեսպանատուն, որպեսզի արտահայտեն իրենց բողոքը: Անկարգությունների հետեւանքով կոտրվել են մի քանի խանութների ցուցափեղկեր, ոստիկանությունը կիրառել է արցունքաբեր գազ:
