Հայ «ֆեյսբուքիստների» թիվը շեշտակի աճում է

Facebook սոցիալական ցանցը մեծ թափով զարգանում է և ռեկորդային թվով օգտատերեր հավաքում ինչպես՝ ողջ աշխարհում, այնպես էլ՝ Հայաստանում։ Մասնավորապես, այս պահի դրությամբ, հենց Facebook-ի տվյալներով, հայաստանցի օգտատերերի թիվը գերազանցում է 330 հազարը։ Մինչդեռ ինտերնետի վիճակագրությամբ զբաղվող www.internetworldstats.com կայքի տվյալներով՝ 2012թ. մարտի 31-ի դրությամբ՝ Հայաստանից գրանցված էր 282700 Facebook-ի օգտատեր։ Այսինքն, 6 ամսվա ընթացքում հայաստանցի «ֆեյսբուքիստների» թիվն աճել է շուրջ 50 հազարով։ Հաշվի առնելով, որ ընդհանուր առմամբ Հայաստանում ինտերնետից օգտվում է շուրջ 1.4 միլիոն մարդ՝ կարելի է պնդել, որ Facebook-ի  հայ օգտատերերի թիվը դեռ կաճի։

Նշենք, որ Facebook-ի տարածման հետ միաժամանակ, ակտիվանում են նաև, այսպես կոչված,  ցանցային առաջխաղացմամբ զբաղվող ընկերություններն ու անհատները։

Եթե պարզ արտահայտվենք, վերջիներս զբաղված են Facebook-ում Like-եր վաճառելով, քանի որ Like-ն արդեն դարձել է իր գինն ունեցող առուծախի առարկա։ Իսկ թե այդ առուծախն ինչպես է ազդում Հայաստանի լրատվական դաշտի ու մասնավորապես ինտերնետ լրատվության վրա, կարող եք կարդալ «168 Ժամ» թերթի վաղվա համարում։