Որպես ԵՄ նախագահող՝ Կիպրոսը Հայաստանի աջակիցն է ԵՄ-ի հետ համագործակցության բոլոր ոլորտներում
Երեկ՝ սեպտեմբերի 14-ին կայացան Հայաստանի եւ Կիպրոսի արտգործնախարարներ Էդվարդ Նալբանդյանի եւ Էրատո Կոզակու-Մարկուլիսի բանակցությունները:
ԱԳՆ մամուլի ծառայությունից հայտնում են, որ, ողջունելով Հայաստանի արտգործնախարարին, Կիպրոսի ԱԳ նախարարն ասել է. «Շատ հաճելի է ողջունել Կիպրոսում Հայաստանի արտգործնախարարին եւ ցուցաբերել նույնպիսի հյուրընկալություն, որին ես արժանացա անցյալ ապրիլին Երեւան իմ այցելության ժամանակ, ինչպես նաեւ շարունակել հանգամանալից երկխոսությունը Կիպրոսի ավանդական բարեկամի եւ դաշնակցի հետ՝ մեր ռազմավարական գործընկերության ընդլայնման վերաբերյալ: Մի քանի օրից Հայաստանի անկախության 21-րդ տարեդարձն է եւ ես կցանկանայի սրտագին շնորհավորել այդ կապակցությամբ: Հայաստանի ժողովուրդը կարող է հպարտ լինել, որ իրենց երկիրը, կարճ ժամանակում հասել է նշանակալի առաջընթացի եւ ներկայանում է ոչ միայն իր հաջողություններով երկրի ներսում, այլ նաեւ հարգանք եւ վստահություն է վայելում միջազգային հանրության կողմից»:
Շնորհակալություն հայտնելով ընդունելության համար՝ նախարար Նալբանդյանը նշեց, որ ինքն ուրախ է կրկին այցելել Կիպրոս, որի հետ Հայաստանը կապում են ժամանակի փորձությունն անցած դարավոր բարեկամությունն ու եղբայրական հարաբերությունները, մի երկիր, որի խորհրդարանը առաջիններից, դեռեւս 1982 թվականին, ճանաչել եւ դատապարտել է Հայոց ցեղասպանությունը, մի երկիր, որտեղ առկա է ակտիվ եւ օրինակելի ինտեգրված հայ համայնք:
Նախարարները հանգամանալից անդրադարձան քաղաքական երկխոսության, միջազգային կառույցներում փոխգործակցության, առեւտրատնտեսական հարաբերությունների զարգացման, միջկառավարական հանձնաժողովի գործունեության, ռազմական համագործակցության, իրավապայմանագրային դաշտի ընդլայնմանն առնչվող հարցերին, քննարկեցին վերականգնվող էներգետիկայի, տուրիզմի, մշակույթի բնագավառներում փոխգործակցության ընդլայնման նպատակով ձեռնարկվելիք քայլերը:
ԵՄ-ում Կիպրոսի նախագահության ենթատեքստում տեղի ունեցավ մտքերի փոխանակում Հայաստան- Եվրոպական Միություն համագործակցության, որպես մուտքի արտոնագրային ռեժիմի ազատականացման առաջին քայլ վիզային ռեժիմի դյուրացման գործընթացի, ազատ եւ համապարփակ առեւտրի գոտու ստեղծման մասին համաձայնագրի շուրջ բանակցությունների ընթացքի վերաբերյալ: Այս համատեքստում ԵՄ ԱԳ նախարարների խորհրդի նախագահ Կոզակու-Մարկուլիսը նշեց, որ Կիպրոսը հանդիսանում է Հայաստանի աջակիցը Եվրոպական Միության հետ համագործակցության բոլոր ոլորտներում:
Քննարկվեցին նաեւ տարեվերջին կայանալիք Հայաստան – Եվրոպական Միություն համագործակցության խորհրդի նիստին առնչվող հարցեր:
Բանակցությունների օրակարգում էին նաեւ կիպրական հիմնահարցի կարգավորմանն ու արցախյան հիմնախնդրի հանգուցալուծմանն առնչվող հարցերը եւ երկու երկրների փոխադարձ աջակցությունը միմյանց կողմից այդ ուղղություններով գործադրվող ջանքերին:
Նախարար Կոզակու-Մարկուլիսը հանգամանալից ներկայացրեց Կիպրոսի բացառիկ տնտեսական գոտում բնական պաշարների օգտագործման Կիպրոսի ինքնիշխան իրավունքի դեմ Թուրքիայի անընդունելի սպառնալիքները եւ ապօրինի գործողությունները:
Անդրադառնալով ադրբեջանցի մարդասպանի ազատ արձակմանը՝ Եվրոպական Միության ԱԳ նախարարների խորհրդի նախագահը ասաց. «Մենք խորապես ափսոսում եւ դատապարտում ենք հրեշավոր հանցագործություն կատարած անձին ներում շնորհելու վերաբերյալ Ադրբեջանի նախագահի որոշումը եւ նրան փառաբանող քայլերը, ու շատ մտահոգված ենք տարածաշրջանային կայունության վրա դրա ազդեցության վերաբերյալ: Անհրաժեշտ է, որպեսզի Ադրբեջանը լիովին հարգի համապատասխան միջազգային կոնվենցիաների տառն ու ոգին, ինչպես նաեւ իրականացնի այն դիվանագիտական հավաստիացումները եւ խոստումները, որոնք տրվել էին»:
Հայաստանի եւ Կիպրոսի արտգործնախարարները քննարկեցին մերձավորարեւելյան զարգացումները: Խոսելով հայ-թուրքական հարաբերությունների կարգավորման վերաբերյալ Հայաստանի նախագահի նախաձեռնության մասին, Կիպրոսի ԱԳ նախարար ասաց.
«Ես ցանկանում եմ ողջունել Հայաստանի իշխանությունների ջանքերը՝ տարածաշրջանային կայունության հաստատման, ներառյալ Թուրքիայի հետ հարաբերությունների կարգավորման ուղղությամբ, որոնք ցավոք սրտի չեն իրագործվում Թուրքիան կողմից արձանագրությունների վավերացման ճանապարհին խոչընդոտներ հարուցելու պատճառով: Որպես կիպրոսցիներ, մենք, դժբախտաբար, ունենք համաձայնությունների չկատարման եւ հետադարձ քայլեր կատարելու տխուր եւ երկար պատմություն Անկարայի հետ, որը նախընտրում է ոչ թե հարգել իր ստորագրությունը, այլ դրա փոխարեն վերափոխել այն սպառնալիքների եւ հետագա ապօրինի քայլերի»:
Հանդիպումից հետո նախարարներն հանդես եկան համատեղ մամուլի ասուլիսով:
Կիպրոսի արտգործնախարարի հետ հանդիպումից առաջ Էդվարդ Նալբանդյանը Հայաստանի արտաքին քաղաքականության մասին ելույթով հանդես եկավ Կիպրոսի ԱԳՆ ղեկավար աշխատակիցների առջեւ եւ պատասխանեց նրանց հարցերին:
Էդվարդ Նալբանդյանի այցելության օրակարգում էր նաեւ կիպրահայ համայնքային կառույցների ղեկավարների հետ հանդիպումը, որոնց արտգործնախարարը ներկայացրեց Հայաստանի արտաքին քաղաքական բնագավառում ձեռնարկվող քայլերը:
