ԱՄՆ-ը սպասում է պարզաբանումների
ԱՄՆ պետքարտուղարությունը հաղորդագրություն է տարածել Ռամիլ Սաֆարովի արտահանձնման և ներման կապակցությամբ։
«Միացյալ Նահանգներին չափազանց մտահոգել է այն նորությունը, որ Ադրբեջանի նախագահը ներում է շնորհել Ադրբեջանցի սպա Ռամիլ Սաֆարովին, ով այսօր Հունգարիայից արտահանձնվել է Բաքվին: Պարոն Սաֆարովը ցմահ պատիժ էր կրում հունգարական բանտում` 2004թ. Բուդապեշտում ՆԱՏՕ-ի դասընթացի ժամանակ հայ սպա Գուրգեն Մարգարյանի սպանության համար:
Մենք մեր խորը անհանգստությունն ենք հայտնում Ադրբեջանին այդ գործողության կապակցությամբ և սպասում ենք պարզաբանումների: Մենք լրացուցիչ մանրամասներ ենք ակնկալում Հունգարիայից` պարոն Սաֆարովին Ադրբեջանին հանձնելու որոշման շուրջ:
Մենք դատապարտում ենք ցանկացած գործողություն, որը կարող է սրել տարածաշրջանային լարվածությունը»,- նշել է ԱՄՆ պետքարտուղարության պաշտոնական ներկայացուցիչ Պատրիկ Վենտրելլը:
