Հացն էլի թանկացավ
Երևանի խանութներում այսօր առավոտից հացի սակավություն է նկատվել: Այսօր առավոտյան ժամը 10:15 սահմաններում խանութները դեռևս հաց չէին ստացել: Քաղաքացիները ստիպված էին հաց գնել միայն տվյալ շրջաններում գործող հացի փռերից:
380 գրամանոց հացը, որը երեկ արժեր 130-140 դրամ, այսօր արդեն վաճառվում էր 160 դրամով:
Նշենք, որ 168.am-ը օրերս անդրադարձել էր հացի գների աճին:
Մեզ հետ զրույցում «Սևանի հացի գործարան» ՓԲԸ տնօրեն Աշոտ Ավետիսյանն ասել էր, թե հացի թանկացումը պայմանավորված է ալյուրի թանկացումով:
«Ալյուրի գնի թանկացման մի քանի գործոններ կան, սակայն այսօրվա պարագայում դա, բնականաբար, միջազգային գնի բարձրացումն է: Այս դեպքում, անշուշտ, համաշխարհային ալյուրի գնի թանկացումն է»,- ասել էր «Սևանի հացի գործարան» ՓԲԸ տնօրեն Աշոտ Ավետիսյանը:
