Խմբագիրն ազատ է արձակվել
Արդբեջանում վաղաժամկետ-պայմանականորեն ազատ է արձակվել islamazeri.az կայքի գլխավոր խմբագիր Ռամին Բայրամովը:
«Ազատություն» ռադիոկայանի ադրբեջանական ծառայության թղթակցի փոխանցմամբ, նման որոշում է կայացրել Բաքվի Սարուխանի շրջանային դատարանը:Բայրամովը և երկու այլ իսլամիստներ ձերբակալվել էին անցած տարվա օգոստոսին: Ադրբեջանի ազգային անվտանգության նախարարությունը նրանց առաջադրել էր «երկրի նկատմամբ թշնամական գործունեության, ինչպես նաև անկարգություններ, հասարակական անվտանգությունը խախտելու և քաղաքացիների անհնազանդությունը սադրելու» մեղադրանք:
Հետագայում, սակայն, Բայրամովի գործն առանձնացվեց, և նա դատապարտվեց մեկուկես տարվա ազատազրկման` ապօրինի կերպով զենք ու թմրանյութ պահելու մեղադրանքով:
Նրան ազատ արձակելու կոչերով հանդես էին եկել ինչպես տեղի իրավապաշտպանները, այնպես էլ «Amnesty International» միջազգային իրավապաշտպան կազմակերպությունը:
Ադրբեջանի կալանավայրերում դեռեւս պատիժ են կրում 7 լրագրողներ, որոնց միջազգային իրավապաշտպան կառույցները համարում են քաղբանտարկյալներ:
