Հալեպում ևս մի հայ է սպանվել
Սիրիայի Հալեպ քաղաքում կրակոցները չեն դադարում. փամփուշտը խոցել է հայկական համայնքի եւս մեկ ներկայացուցչի: Հայաշատ թաղամասի այգում հրազենից մահացել է 76-ամյա Ադելինա Խաչերյանը:
«Արմենպրես»-ի հետ զրույցում Հալեպի ազգային առաջնորդարանի մամուլի խոսնակ Ժիրայր Ռեիսյանը նշել է, որ հայկական համայնքի ներկայացուցիչը չի եղել նշանառուի թիրախ. նա այգուց հեռու փոխհրաձգության պատահական զոհ է: «Նման դեպքերը հայերի դեմ չեն ուղղված, սակայն հայերն էլ են տուժում ընդհանուր իրավիճակից»,-ասել է Ռեիսյանը:
Հալեպահայերի ֆեյսբուքյան էջում կատարված գրառման համաձայն` ռումբի պայթյունի հետեւանքով ծանր վիրավորվել է նաեւ համայնքի ներկայացուցիչ Մեսրոպ Չինչինյանը: Նա վիրահատության է ենթարկվել, վիճակը բարելավվում է:
