ՀՀԿ երիտասարդները մասնակցելու են «Գագիկ Ծառուկյանի բարձր հովանու ներքո» կայանալիք միջոցառմանը
«Մենք ստացել ենք Առաջին Եվրասիական երիտասարդական համաժողովին մասնակցության հրավերը»,- 168.am-ի հետ զրույցում ասաց ՀՀԿ երիտասարդական կառույցի ղեկավար Կարեն Ավագյանը` անդրադառնալով ԲՀԿ Երիտասարդական միության նախաձեռնությամբ օգոստոսի 22-27-ը «ԲՀԿ առաջնորդ Գագիկ Ծառուկյանի բարձր հովանու ներքո» կայանալիք միջոցառմանը:
Մեր հարցին` արդյո՞ք ՀՀԿ երիտասարդական կառույցը նույնպես աջակցում է Եվրասիական միությանը Հայաստանի անդամակցության գաղափարին, Կ.Ավագյանը պատասխանեց. «Այս պահին աջակցության որևէ խնդիր չկա: Ցանկացած ինտեգրացիոն ծրագրեր մենք կիսում ենք: Ըստ էության, Եվրասիական միության հետ կապված դեռ նոր-նոր են մշակվում այն բոլոր գործընթացները, որոնք պետք է նմանատիպ հանդիպումների, քննարկումների և սեմինարների ընթացքում ավելի շատ հստակեցվեն: Դրանք ինտեգրացիոն ծրագրեր են, որին մենք մեր մասնակցությունն ունենք: Այստեղ կողմ-դեմի խնդիր չկա»:
