Սերժ Թանկեանը համերգի ժամանակ կրել է Թեղուտի շապիկը (տեսանյութ)
Այսօր Ֆիլադելֆիայում «System of a Down»-ի համերգին բնապահպան ակտիվիստ
Սերժ Թանկեանը կրել է Թեղուտի շապիկը, ի պաշտպանություն Թեղուտի
փրկության: Շապիկի վրա գրված է եղել. «Թող ողջ աշխարհը իմանա, ԹԵՂՈՒՏԸ ՀԱՆՔ ՉԻ ԴԱՌՆԱ!!!»:
Շուտով նա ի պաշտպանություն Թեղուտի հանդես կգա վիդեո հաղորդագրությամբ:
«Մենք պահանջում ենք` դադարեցնել Թեղուտի հանքարդյունաբերական ծրագիրը,
վերականգնել բնությանը, մարդկանց և մշակութային հուշարձաններին հասցված
վնասը, բարեփոխել ՀՀ համապատասխան օրենսդրությունը` բարձր հարկերի,
բնապահպանական վճարների և պետական կարգավորման մեխանիզմների միջոցով
ապահովելով շրջակա միջավայրի և բնական պաշարների պաշտպանությունը»:
Հիշեցնենք, որ մեկ տարի առաջ Սերժ Թանկեանը ուղերձ էր հղել, որտեղ ասված էր. «Վայրի բնության և շրջակա միջավայրի ավերումն այլևս չեն կարող արդարացվել
առաջընթացի կամ բնական ռեսուրսների օգտագործման անունով:
Քաղաքակրթությունը քայլում է մի բարակ պարանով` սեփական գոյատևման և ամեն
ինչի ավերման միջև: Հիմնվելով մեր պատմական անցյալի և ներկա
աշխարհաքաղաքական իրողության վրա` սննդի, ջրի և էներգիայի հարցում
վստահությունը սեփական ուժերին չափազանց կարևոր են: Վայրի բնության
ավերումը և դրա արդյունքում ավելացող կարբոնային արտանետումները դեպի
մթնոլորտ պայմաններ են ստեղծել գլոբալ տաքացման համար, ինչը խիստ
սահմանափակում է մեր ինքնավստահությունը: Հանքարդյունաբերությունը դեմ է
մեր համատեղ շահերին` որպես ժողովուրդ և պետություն»:
