Samsung-ը դարձել է սմարթֆոնների համաշխարհային մատակարարումների առաջատարը
Samsung սմարթֆոնների հարավկորեական արտադրող ընկերությունը 2017 թվականի երրորդ եռամսյակում, ինչպես եւ դրան նախորդած եռամսյակում դարձել է սմարթֆոնների համաշխարհային մատակարարումների առաջատարը՝ տարեկան արտահայտությամբ մատակարարելով 9,5 տոկոսով ավելի շատ հեռախոսներ՝ 83,3 մլն հատ: Այդ մասին ասված է International Data Corporation (IDC) վերլուծական ֆիրմայի հետազոտության մեջ:
Սմարթֆոնների շուկայում Samsung-ի բաժինը մեկ տարի առաջվա 20,9 տոկոսից ավելացել է մինչեւ 22,3 տոկոս: Համեմատության համար նշենք, որ Apple ամերիկյան կորպորացիան հաշվետու երեք ամսվա ընթացքում մատակարարել է 46,7 մլն սմարթֆոն (տարեկան արտահայտությամբ աճը՝ 2,6 տոկոս), շուկայում նրա բաժինը պահպանվել է անցյալ տարվա 12,5 տոկոսի մակարդակի վրա:
«Samsung-ը վերստին սմարթֆոնների համաշխարհային շուկայի առաջատարն է դարձել՝ մատակարարելով 83,3 մլն միավոր, ինչը 9,5 տոկոսով ավելի է, քան անցյալ տարի: Կորեական հսկան ներկայացրել է նոր 6,3 դյույմանոց Note8 սմարթֆոնը, ինչը դրականորեն է ազդել նրա գործառական ցուցանիշների վրա: Samsung-ը հայտնում է իր արտադրանքի նշանակալի պահանջարկի մասին եւ, ինչպես երեւում է, պաշտոնապես վերջ է դրել Note 7-ի ձախողման հետ կապված անցյալ տարվա պատմությանը»,-ասված է հաղորդագրության մեջ:
Մատակարարումների ցուցանիշներով՝ սմարթֆոններ արտադրող ընկերությունների առաջին հնգյակում հայտնվել են միանգամից երեք չինական ընկերություններ՝ Huawei-ն, OPPO-ն եւ Xiaomi-ն: Huawei ընկերությունը մատակարարել է 39,1 մլն սմարթֆոն՝ ցուցանիշը տարեկան արտահայտությամբ ավելացնելով 16,1 տոկոսով (բաժինը հասել է 10,5 տոկոսի՝ 2016 թվականի երրորդ եռամսյակի 9,3 տոկոսի դիմաց):
OPPO ընկերությունը մատակարարումները տարեկան արտահայտությամբ ավելացրել է 19 տոկոսով՝ մինչեւ 30,7 մլն սմարթֆոն (շուկայում նրա բաժինը հասել է 8,2 տոկոսի՝ մեկ տարի առաջվա 7,1 տոկոսի դիմաց):
Չինական Xiaomi-ն մատակարարման ծավալներով կրկին հինգերորդ հորիզոնականում է հայտնվել աշխարհում սմարթֆոնների խոշորագույն մատակարարների թվում: Ընկերությունը տարեկան արտահայտությամբ մատակարարումներն ավելացրել է ավելի քան 2 անգամ՝ մինչեւ 27,6 մլն սմարթֆոն: Շուկայի նրա բաժինը բարձրացել է մինչեւ 7,4 տոկոս՝ մեկ տարի առաջվա հաշվետու ժամանակաշրջանի 3,7 տոկոսի դիմաց: «Ցուցանիշների աճի պատճառը դարձել է բարձր պահանջարկը Հնդկաստանի շուկայում»,-նշում է IDC-ն, հաղորդել է ՌԻԱ Նովոստի գործակալությունը:
