Գիշերային հարձակումների հիմնական թիրախը Ուկրաինայի էներգետիկան էր․ Զելենսկի
Երեքշաբթի գիշերը ռուսական հարձակումների գլխավոր թիրախը եղել է Ուկրաինայի էներգետիկան, Telegram-ում գրել է Ուկրաինայի նախագահ Վլադիմիր Զելենսկին։
Մասնավորապես, հարձակումների են ենթարկվել Խարկովի և Սումիի մարզերի էներգետիկ ենթակառուցվածքների օբյեկտները։
«Ամենուր, որտեղ անհրաժեշտ է, այժմ աշխատում են պահանջվող ծառայությունները, շարունակվում են վերականգնողական աշխատանքները», – գրել է Զելենսկին։
«Ամեն օր, ամեն գիշեր Ռուսաստանը հարվածում է էլեկտրակայաններին, էլեկտրահաղորդման գծերին, մեր գազային օբյեկտները հարվածների տակ են», – հավելել է նա։
Զելենսկին նաև հույս է հայտնել, որ ԱՄՆ-ը և Ուկրաինայի եվրոպական գործընկերները կտրամադրեն երկիրը պաշտպանելու համար անհրաժեշտ ՀՕՊ միջոցները։
«Աշխարհը պետք է ստիպի Մոսկվային նստել իսկական բանակցությունների սեղանի շուրջ։ Միայն ուժի միջոցով խաղաղությունը կարող է արդյունք բերել», – ավարտել է ուկրաինացի նախագահն իր հաղորդագրությունը։
