Չինաստանում զբոսաշրջիկների համար բացել են աշխարհի խոշորագույն ռադոհեռադիտակը
Չինաստանի հարավ արեւմուտքի Գույչժոուի նահանգի լեռնային շրջանում բացել են FAST (Five hundred meter Aperture Spherical Telescope) աշխարհում խոշորագույն ռադիոհեռադիտակը զբոսաշրջիկների անվճար այցելության համար, հաղորդում է «Սինհուա» գործակալությունը: FASTը գործարկվել է 2016 թվականի սեպտեմբերին:
Նշվում է, որ աստղադիտակի նորմալ աշխատանքի ապահովման համար դրա շուրջը հինգ կիլոմետր շառավղով հատկացվել է այսպես կոչված «լռության գոտի», որտեղ կարգելափակվեն շարժական հեռահաղորդակցական սարքերի ազդանշանները: Ամեն օր աստղադիտակ կարող է այցելել միայն 2 հազար մարդ:
Վիթխարի ռադիոհեռադիտակի կառուցման նախաձեռնությամբ չինացի մասնագետները հանդես էին եկել 1994 թվականին: Աստղադիտակի շինարարությունը, որի մակերեսը հավասար է 30 ֆուտբոլի դաշտի, պարագիծը՝ 1,6 կիլոմետրի, իսկ տրամագիծը՝ 500 մետրի, սկսվել է 2011 թվականի մարտին:
Աստղադիտակը գտնվում է Գույչժոուի նահանգում՝ բարձր լեռներում: Նախագծում ներդրումների ընդհանուր ծավալը գնահատվում է 1,2 միլիարդ յուան (շուրջ 180 միլիոն դոլար). հաղորդել է ՌԻԱ Նովոստին:
