Իսրայելը Գազայի հատվածում գտնվող հիվանդանոցի է հարվածել. զոհեր և վիրավորներ կան
Իսրայելցի զինվորականները հարվածել են Խան Յունիս քաղաքում գտնվող «Նասեր» բժշկական համալիրի վիրաբուժական մասնաճյուղին, զոհեր և վիրավորներ կան։
Նախնական տվյալների համաձայն՝ առնվազն վեց մարդ է զոհվել, այդ թվում՝ բժշկական անձնակազմի անդամներ և բուժառուներ։ Եվս 20-ը վիրավորվել են։
Al Jazeera-ի տվյալներով՝ հիվանդանոցի վիրաբուժական բաժանմունքը հարձակումից հետո դադարեցրել է աշխատանքը։
ՑԱԽԱԼ–ի մամուլի ծառայությունն այսօր հայտնել է, որ զինվորականները հարվածել են «Նասեր» հիվանդանոցին՝ իբր «բժշկական համալիրի տարածքում գործող պաղեստինյան ՀԱՄԱՍ շարժման զինյալներին վերացնելու համար»։
Միևնույն ժամանակ, Գազայի հատվածի առողջապահության նախարարությունը դատապարտել է հիվանդանոցին ՑԱԽԱԼ–ի հասցրած հարվածը։ Նախարարությունն ընդգծել է, որ բժշկական հաստատությանը հարվածելը լուրջ ոտնձգություն է առողջապահական համակարգի նկատմամբ և միջազգային նորմերի ու կոնվենցիաների կոպիտ խախտում է։
Գերատեսչությունը կոչ է արել միջազգային հանրությանը, ՄԱԿ-ի կառույցներին և իրավապաշտպան կազմակերպություններին անհապաղ միջամտել, ապահովել հիվանդանոցների, բուժանձնակազմի և բուժառուների պաշտպանությունը։
Ավելի վաղ ՄԱԿ-ի գլխավոր քարտուղար Անտոնիու Գուտերեշը հայտարարել էր, որ Գազայի հատվածում հրադադարի պայմանները չեն պահպանվում, պաղեստինցի երեխաներ են շարունակում զոհվել, մարդասիրական իրավիճակն էլ շարունակում է աղետալի մնալ։
Հիշեցնենք, որ ԱՄՆ նախագահ Դոնալդ Թրամփի խաղաղության ծրագիրը, որը ՄԱԿ-ի Անվտանգության խորհրդի կողմից հաստատվել է 2025 թվականի նոյեմբերին, նախատեսում է հրադադար, Գազայի հատվածը կառավարելու համար տեխնոկրատական կառավարման ստեղծում, զինված խմբավորումների զինաթափում և միջազգային ուժերի տեղակայում։
