Նազարբաևն առաջարկել է թուլացնել նախագահական իշխանությունը
Ռուսական РИА Новости լրատվական գործակալության փոխանցմամբ՝ Ղազախստանի նախագահ Նուրսուլթան Նազարբաևը մտադիր է երկրում նախագահական իշխանության թուլացման հաշվին ուժեղացնել կառավարության ու խորհրդարանի դերը:
Նազարբաևն այս մասին հայտարարել է ԱՊՀ երկրների պատվիրակությունների ղեկավարների հետ հանդիպման ժամանակ. «Հավանաբար անհրաժեշտ է ավելի շատ իրավունքներ ընձեռել խորհրդարանին ու կառավարությանը:
Ցայժմ մեզ մոտ եղել է նախագահական իշխանություն: Տնտեսական միջին դասի աճի հետ մեկտեղ՝ հավանաբար անհրաժեշտ է թուլացնել նախագահական իշխանությունը և ավելի շատ լիազորություններ շնորհել կառավարությանն ու խորհրդարանին:
Մեր գործերը պետք է լինեն բաց, եթե դա պետական գաղտնիք չէ, ապա մարդկանց համար պետք է մատչելի լինի տեղեկատվությունը, կառավարության որոշումները՝ հատկապես տեղում:
Բյուջեն պետք է հստակեցնել բաց ձևով, տեղի խորհրդարաններում, հասարակական կազմակերպությունների ու մարդկանց մասնակցությամբ: Եվ պետք է հաշվետվություն ներկայացնել, յուրաքանչյուր կես տարին մեկ անգամ պատասխանել հարցերին»: Նազարբաևն ընդգծել է, որ երկրում այժմ տարվում են նման աշխատանքներ:
