ԵՄ-ը սկսել է ռուսական քարոզչության դեմ պայքարը. Մողերինի
Ռուսական Интерфакс լրատվական գործակալության փոխանցմամբ՝ ԵՄ-ի դիվանագիտության ղեկավար Ֆեդերիկա Մողերինին հայտարարել է, որ ԵՄ-ն արդեն իսկ սկսել է պայքար մղել ռուսական քարոզչության դեմ.
«Հարցը հակաքարոզչություն ստեղծելու մեջ չէ, խոսքն ավելի շուտ գնում է ԶԼՄ-ների ազատությանն աջակցելու մասին, այդ թվում նաև Ռուսաստանում: Տվյալ ուղղությամբ դեռ պատրաստված չեն կոնկրետ առաջարկներ: Մենք սկսել ենք մեր աշխատանքը»:
Մողերինիի խոսքերով՝ այդ հարցը քննարկվելու է Եվրոպական խորհրդի ու Արտաքին հարաբերությունների խորհրդի նիստերում: Մողերինին հավելել է, որ Բրյուսելը պետք է համագործակցություն հաստատի Ռուսաստանի քաղաքացիների հետ:
Մողերինին հայտարարել է, որ Ռուսաստանի իշխանությունները պետք է վերջ դնեն բազմակարծության հանդեպ կասկածի, ատելության, անհանդուրժողականության մթնոլորտին: Մողերինին ընդգծել է, որ ռուսաստանցիներն արժանի են ունենալ ժողովրդավարական ու բաց Ռուսաստան, որի ԶԼՄ-ները կներկայացնեն տարբեր կարծիքներ:
Հիշեցնենք, որ ավելի վաղ հաղորդվել էր, որ ԵՄ-ը ստեղծելու է իր ռուսալեզու հեռուստաալիքը:
