Սուննի զինյալներն Իրաքում գրավել են քիմիական զենքի արտադրության կենտրոնը
Ամերիկյան The Wall Street Journal թերթի փոխանցմամբ՝ սուննի ծայրահեղականներն Իրաքում գրավել են քիմիական զենքի արտադրության կենտրոնը, որը գործել է Սադդամ Հուսեյնի նախագահության ժամանակ:
Թերթի տվյալներով՝ Բաղդադից 70 կիլոմետր դեպի հյուսիս-արևմուտք ընկած «Ալ-Մուտանա» գործարանում պահվում է հնացած քիմիական զենքի խմբաքանակ: Ամերիկյան վարչակազմի ներկայացուցիչները կարծում են, որ զինյալները չեն կարող այդ նյութերից ստանալ մարտական քիմիական զենք:
«Լևանտում ու Իրաքում իսլամական պետություն» խմբավորման զինյալների կողմից քիմիական զենքի արտադրման կենտրոնի գրավումն արժանացել է ԱՄՆ-ի իշխանությունների ուշադրությանը: Պետդեպարտամենտի ներկայացուցիչ Ջեն Փսակին հայտարարել է, որ իրենց մոտ մտահոգություն է առաջացնում զինյալների կողմից ցանկացած ռազմական օբյեկտի գրավումը:
