Դամասկոսն այսօր նավթի հետախուզման պայմանագիր կստորագրի ռուսական ընկերության հետ. աղբյուր
Ռուսական РИА Новости լրատվական գործակալության փոխանցմամբ՝ Սիրիայի նավթարդյունաբերության նախարարություն այսօր Դամասկոսում «Սոյուզնեֆտեգազ» ընկերության հետ շելֆի հետախուզման մասին պայմանագիր է ստորագրելու՝ իր տարածքային ջրերում նավթ և գազ որոնելու համար:
Այս մասին գործակալությանը հայտնում է Դամասկոսում նրա աղբյուրը: Իրավիճակին մոտ կանգնած մեկ այլ աղբյուր հաստատել է, որ այսօր Դամասկոս է ժամանելու «Սոյուզնեֆտեգազի» ղեկավարությունը՝ պայմանագիր ստորագրելու համար: Սակայն երկրորդ աղբյուրը չի հայտնել, թե որտեղ և երբ տեղի կունենա դա:
Սիրիայի պետական հեռուստատեսությունը նոյեմբերի 20-ին, վկայակոչելով երկրի նավթարդյունաբերության նախարար Սուլեյման Ալ-Աբբասին, հայտնել էր, որ Սիրիայի կառավարությունը հավանության է արժանացրել նախարարության և «Սոյուզնեֆտեգազի» միջև բանակցությունների արդյունքները և մոտ ժամանակներս պայմանագիր է ստորագրվելու նավթի հետախուզման մասին:
