Ապացուցվել է, որ ԿՀՎ-ն մասնակցել է 60 տարի առաջ Իրանում իրականացված հեղաշրջմանը
Թուրքական Cihan լրատվական գործակալության փոխանցմամբ՝ ԱՄՆ-ում հրապարակվել են մի շարք փաստաթղթեր, որոնք պացուցում են, որ Կենտրոնական հետախուզական վարչությունը (ԿՀՎ) դերակատարություն է ունեցել 1953 թվականին Իրանում իրականացված հեղաշրջման կազմակերպման մեջ:
Իրանի նախկին վարչապետ Մոհամմեդ Մոսադեղի կառավարության տապալման 60-ամյակի կապակցությամբ հրապարակված փաստաթղթերը պատկանում են ԱՄՆ Ազգային անվտանգության արխիվին: Դրանք վկայել են, որ Մեծ Բրիտանիան նույնպես մասնակցություն է ունեցել Մոսադեղի կառավարության տապալմանը:
Հիշեցնենք, որ 1953 թվականի օգոստոսի 15-19-ին ամերիկյան ու բրիտանական հետախուզությունների աջակցությամբ իրանական բանակի սպաները գահընկեց արեցին ազգայնական քաղաքական գործիչ Մոհամմեդ Մոսադեղի կառավարությունը:
Ազգային ճակատի ղեկավար Մոսադեղն Իրանի վարչապետ է դարձել 1951 թվականի գարնանը, ինչից հետո օրենք էր ստորագրել նավթահանքերի ազգայնացման մասին, որոնք պատկանում էին Անգլո-իրանական նավթային ընկերությանը, որն այսօր հայտնի է BP անվանմամբ:
Ապա Մոսադեղն Իրանից վտարում է բրիտանացի բոլոր մասնագետներին ու խորհրդականներին, իսկ 1952 թվականին ընդհանրապես խզում է Լոնդոնի հետ դիվանագիտական հարաբերությունները: 1953 թվականին էլ նա Թեհրանից վտարեց երիտասարդ շահ Մոհամմեդ Ռեզա Փեհլևիին:
Նշվում է, որ 1953 թվականին Իրանում իրականացրած հեղաշրջումը նմանատիպ առաջին լուրջ հաջողությունն է 1947 թվականին ստեղծված ԿՀՎ-ի համար:
