Լեհաստանում ձերբակալել են ուկրաինացու, որը երկրի նախագահի հասցեին սպառնալիքներ էր հրապարակել
Լեհաստանի Զելյոնա Գուրա քաղաքում ոստիկանությունը ձերբակալել է Ուկրաինայի 36-ամյա քաղաքացու, որը կասկածվում է համացանցում Լեհաստանի նախագահ Կարոլ Նավրոցկու հասցեին սպառնալիքներ հրապարակելու մեջ։
Ինչպես Polsat News-ի հարցազրույցում հայտնել է ոստիկանության ներկայացուցիչ Աննա Բարանը, իրավապահ մարմինները ստացել են առցանց զրույցի ձայնագրությունը, որում, ենթադրաբար, հնչել են սպառնալիքներ լեհական պետության ղեկավարի հասցեին։
«Հրապարակված նյութերի մասին տեղեկությունն ստանալուց հետո քրեական ոստիկանության աշխատակիցներն անմիջապես պարզել են այդ տղամարդու գտնվելու վայրը», — նշել է ոստիկանության ներկայացուցիչը՝ ճշտելով, որ կասկածյալը 36 տարեկան է և Ուկրաինայի քաղաքացի։
Ոստիկանության տվյալներով՝ տղամարդուն ձերբակալել են միջադեպի բացահայտման հաջորդ օրը։ Նա տեղափոխվել է դատախազություն, որտեղ քննիչը սկսել է գործի նյութերի ուսումնասիրությունը։
Նախնական գնահատմամբ՝ նրան կարող է մեղադրանք առաջադրվել Լեհաստանի սահմանադրական մարմնին վիրավորելու համար՝ նախագահի հասցեին հնչեցված սպառնալիքների կապակցությամբ։
Գործողությունները համապատասխանում են Լեհաստանի քրեական օրենսգրքի 226-րդ հոդվածին, որը նախատեսում է տուգանք կամ մինչև երկու տարի ազատազրկում։
