«Նուբարաշեն» ՔԿՀ-ում կանխվել է դատապարտյալին փաթեթավորված թմրամիջոցի փոխանցումը
Հունիսի 24-ին՝ ժամը 16:16-ի սահմաններում, ՀՀ ԱՆ «Նուբարաշեն» քրեակատարողական հիմնարկի ծառայողները տեսահսկման համակարգի միջոցով նկատել են, որ դատապարտյալի մոտ կարճատև տեսակցության եկած քաղաքացին դրսևորում է կասկածելի վարքագիծ:
Արձագանքելով իրավիճակին, անմիջապես մուտք են գործել կարճատև տեսակցությունների սենյակ և նկատել, որ քաղաքացին փորձում է ինչ-որ առարկա թաքցնել: Կրկնակի խուզարկության ենթարկելու նպատակով քաղաքացուն ուղեկցել են համապատասխան սենյակ, այդ ընթացքում վերջինս փորձել է հատակին գցել երկու սև փաթեթ, որոնք թաքցրած է եղել ներքնաշորի մեջ:
Փաթեթների զննությամբ պարզվել է, որ դրանցից մեկում առկա է եղել թմրամիջոցին նմանվող, բյուրեղանման, 1.0 գրամ զանգված, իսկ երկրորդում՝ 1.5 գրամ դեղնականաչավուն բուսական զանգված:
Քաղաքացին ձերբակալվել է Քրեակատարողական ծառայության կենտրոնական մարմնի օպերատիվ վարչության «Նուբարաշեն» տարածքային բաժնի ծառայողների կողմից և հայտնաբերված զանգվածների հետ ներկայացվել ՀՀ ՔԿ Էրեբունի և Նուբարաշեն վարչական շրջանների քննչական բաժին:
