Էրդողանը պաշտոնական այցով կմեկնի Եթովպիա
Թուրքիայի նախագահ Ռեջեփ Թայիփ Էրդողանը Եթովպիայի վարչապետ Աբիյ Ահմեդ Ալիի հրավերով պաշտոնական այցով կմեկնի Ադիս Աբեբա։ Այս մասին տեղեկացնում է ermenihaber.am-ը։
Այցի ընթացքում նախատեսվում է քննարկել երկկողմ հարաբերությունները, ինչպես նաև տարածաշրջանային և գլոբալ հարցեր։ Էրդողանը նախ կայցելի Ադվայի հուշարձան, այնուհետև Եթովպիայի ազգային պալատում պաշտոնական արարողությամբ կընդունվի վարչապետի կողմից։
Առաջնորդների առանձնազրույցից հետո կկայանան ընդլայնված ձևաչափով բանակցություններ, որոնց ընթացքում կքննարկվեն տնտեսական համագործակցությունը, ռազմավարական գործընկերության խորացումը և Աֆրիկայի եղջյուրի տարածաշրջանի անվտանգությունը։ Օրակարգում կլինի նաև 2024 թվականի դեկտեմբերին Անկարայում ստորագրված համաձայնագրի իրականացումը, որը նպատակ ունի կարգավորել Եթովպիայի և Սոմալիի միջև ճգնաժամը։
Բանակցությունների ավարտին նախատեսվում է մի շարք համագործակցության համաձայնագրերի ստորագրում։ Էրդողանն ու Աբիյ Ահմեդ Ալին համատեղ մամուլի ասուլիսով կամփոփեն այցի արդյունքները։
