Լարսը ժամանակավորապես փակվել է բեռնատարների համար
Վրաստանի տարածքում եղանակային պայմանների վատթարացման պատճառով ժամանակավորապես դադարեցվել է բեռնատարների երթևեկությունը Ռազմավիրական ճանապարհով:
Ինչպես տեղեկանում ենք «Ինտերֆաքս» գործակալությունից, այդ մասին հաղորդել է Հյուսիսային Օսիայի արտակարգ իրավիճակների նախարարության գլխավոր վարչությունը։
«Վրաստանի տարածքում եղանակային պայմանների վատթարացման և անվտանգ երթևեկությունն ապահովելու անհնարինության կապակցությամբ Վլադիկավկազ-Լարս հատվածով Ռուսաստանի Դաշնությունից դուրս գալու ուղղությամբ մեծ բեռնատար ավտոտրանսպորտային միջոցների երթևեկությունն արգելված է Մոսկվայի ժամանակով ժամը 08:20-ից, մինչև հատուկ կարգադրություն կլինի», – ասվում է հաղորդագրության մեջ։
Ռազմավիրական ճանապարհը միակ ցամաքային երթուղին է, որը Ռուսաստանը կապում է Վրաստանի և Հայաստանի հետ։
