Ուզում եք կոորդինատ տա՞մ, լո՞ւրջ. հարցերը կլուծվեն, մերոնք հարևանների հետ առևտուր կանեն. Ալեն Սիմոնյան
Հիմա դուք ուզում եք՝ ես ձեզ կոորդինատներ տամ, հա՞, լո՞ւրջ եք ասում, ուզում եք զորամիավորումների կոորդինատնե՞ր տամ. ԱԺ-ում լրագրողների հետ ճեպազրույցի ժամանակ ասաց ԱԺ նախագահ Ալեն Սիմոնյանը՝ ի պատասխան լրագրողի այն հարցին, թե սահմանին որտե՞ղ են հայկական ուժերն առաջ, որ պետք է հետ գնան, ինչպես ավելի վաղ ինքն էր հայտարարել։
«Ակնհայտ է, դա նաև երևաց Տավուշի սահմանը վերարտադրելու ժամանակ, որ ինչ-որ տեղեր մենք ենք առաջ, ինչ-որ տեղեր իրենք։ Սահման է, եթե սահմանազատված չէ, այդ խնդիրը կա։ Վերևից մինչև ներքև պետք է սահմանը վեր հանենք»,-նշեց Սիմոնյանը։
Սիմոնյանը նման հայտարարությունը վտանգավոր չի համարում, քանի որ, ըստ նրա, առնվազն Տավուշում երկու եռանկյունի կա, և Ադրբեջանի տարածքի եռանկյունին ՀՀ տիրապետության մաս է, ՀՀ-ինը՝ Ադրբեջանի։
«Իմ ասածն այն է, որ բոլոր այն տեղերում, որտեղ մենք ենք՝ իրենք պետք է առաջ գնան, և որը մերն է՝ մենք»,-ասաց նա և նշեց, որ Ադրբեջանը 200 քառակուսի կմ-ի չափով ՀՀ տարածքի մեջ է և պետք է հետ գնա։
