Բանգլադեշի խորհրդարանը ցրվել է

Բանգլադեշի խորհրդարանը ցրվել է երկրի վարչապետ Շեյխ Հասինայի հրաժարականից մեկ օր անց։ Այս մասին հաղորդում է վկայակոչելով Reuters-ը։ 

Ուսանող ցուցարարների առաջնորդները խորհրդարանի ցրման համար վերջնաժամկետ էին տվել մինչև օգոստոսի 6-ին տեղի ժամանակով ժամը 15։00-ն։ Նրանք նախազգուշացրել էին, որ «խիստ ծրագիր» կսկսվի, եթե մինչև նշված վերջնաժամկետը խորհրդարանը չցրվի։

Ըստ New Age պարբերականի՝ մայրաքաղաք Դաքայում պետական պաշտոնյաները խուճապի մեջ լքում են աշխատավայրերը՝ վախենալով իրենց անվտանգության համար։ Բանգլադեշի բանակի շտաբի պետ Վակեր ուզ Զամանը հայտարարել է, որ ստեղծվել է ժամանակավոր կառավարություն՝ բոլոր կուսակցությունների մասնակցությամբ։ Զամանը նշել է, որ ժամանակավոր կառավարության գործունեության և երկրում իրավիճակի կարգավորման հետ կապված միջոցներ են ձեռնարկվում երկրի նախագահ Շահաբուդդին Չուպպուի հետ, իսկ երկրի հետ կապված բոլոր որոշումները կայացնելու է բանակը։

Ավելի վաղ Բանգլադեշի նախագահը երկրի բնակիչներին տեսաուղերձում հայտնել էր խորհրդարանի ցրման և ընդդիմադիր կուսակցության ղեկավարին բանտից ազատելու մասին։

Օգոստոսի 5-ին տեղի ունեցած անկարգությունների հետևանքով Բանգլադեշում զոհվել է 109 մարդ։ Երկրում հուլիսից ընթացող ցույցերի ժամանակ զոհերի ընդհանուր թիվը հասել է 409-ի։