Ինչպե՞ս դիմել և ստանալ քաղաքաշինական թույլտվություններ urban.e-gov.am հարթակում. անիմացիոն հոլովակ
Oգոստոսի 1-ից քաղաքաշինական թույլտվությունների տրամադրման ողջ գործընթացը hանրապետության 4 մարզերում իրականացվելու է բացառապես էլեկտրոնային եղանակով՝ urban.e-gov.am հարթակում։ Քաղաքաշինության կոմիտեն ներկայացնում է գործընթացը նկարագրող անիմացիոն հոլովակ։
Այսպիսով՝ Կոտայքի, Արմավիրի, Արարատի և Լոռու մարզերում կառուցապատում իրականացնելիս համայնքի ղեկավարի կողմից տրամադրվող քաղաքաշինական փաստաթղթերը ստանալու համար անհրաժեշտ է էլեկտրոնային դիմում ներկայացնել urban.e-gov.am հարթակի միջոցով։ Ուստի պետք է ձեռք բերել նույնականացման կամ բջջային նույնականացման քարտ։
Համակարգում առանձնացված են նախագծման, շինարարության, քանդման թույլտվությունների, ավարտական ակտի (շահագործման թույլտվություն), ինչպես նաև թույլտվության երկարաձգման և մի շարք այլ գործառույթների համար դիմելու դաշտեր։
Քաղաքացիները, կազմակերպությունները կամ նրանց կողմից լիազորված անձինք կարող են էլեկտրոնային համակարգում հետևել իրենց դիմումի ընթացքին։ Գործընթացի բոլոր մասնակիցների՝ պետական գերատեսչությունների, տեղական ինքնակառավարման մարմինների, մատակարար և այլ կազմակերպությունների աշխատանքը կլինի թափանցիկ ու վերահսկելի։ Թույլտվության տրամադրման հետագիծը կպահպանվի համակարգում։
Հայաստանի ամբողջ տարածքում քաղաքաշինական թույլտվությունների տրամադրման գործընթացը թվային եղանակով նախատեսվում է իրականացնել 2025 թվականի հունվարից։
Հիշեցնենք, որ թվայնացման գործընթացը պիլոտային ծրագրով մեկնարկել էր 2022 թվականի հունվարի 1-ից՝ Կոտայքի մարզի Նաիրի, Արմավիրի մարզի Վաղարշապատ, Արարատի մարզի Մասիս և Լոռու մարզի Վանաձոր համայնքներում e-permits.am համակարգի գործարկմամբ։
Քաղաքաշինական թույլտվությունների տրամադրման գործընթացը կանոնակարգվում է «Քաղաքաշինության մասին» ՀՀ օրենքով, ՀՀ կառավարության 2015թ. մարտի 19-ի N 596-Ն և 2021թ. դեկտեմբերի 2-ի N 1985-Ն որոշումներով։
Քաղաքաշինության կոմիտե
