Դամասկոսում Իրանի դեսպանը չի տուժել իսրայելական ավիահարվածից
Սիրիայում Իրանի դեսպան Հոսեյն Աքբարին չի տուժել Դամասկոսում Իրանի դեսպանատան մոտ գտնվող շենքի վրա իսրայելական ավիահարվածից: Այս մասին հայտնում է «Nour News»-ը։
Ավելի վաղ սիրիական պետական հեռուստատեսությունը հայտնել էր, որ սիրիական հակաօդային պաշտպանությունը հետ է մղում հարձակումը Դամասկոսի մերձակայքում, լսվել են պայթյուններ։
Սիրիական «Al Ikhbariya» հեռուստաալիքը հայտնել է, որ Իսրայելը հարվածել է Սիրիայի մայրաքաղաք Դամասկոսի հարավ-արևմուտքում Ալ-Մեզզա շրջանի շենքին:
«Դամասկոսում Իրանի Իսլամական Հանրապետության դեսպան Հոսեյն Աքբարին և նրա ընտանիքը չեն տուժել այս հարձակման հետևանքով»,- ասվում է գործակալության հաղորդագրությունում։
«ՌԻԱ Նովոստի»-ի թղթակիցը հաղորդել է, որ իսրայելական հրթիռը հարվածել է Սիրիայի մայրաքաղաք Դամասկոսում Իրանի դեսպանատան մոտ գտնվող տանը, վնասվել է նաև դիվանագիտական առաքելության շենքը։
