ԱՄՆ-ում անհրաժեշտ են համարում Գազայի հատվածի անվտանգության համար միջանկյալ լուծումը
Միացյալ Նահանգները պնդում է, որ Գազայի հատվածի անվտանգության համար անհրաժեշտ է միջանկյալ ինչ-որ լուծում, մինչև Պաղեստինի ազգային թարմացված վարչակազմի ձևավորումը։
Այս մասին հայտարարել է ԱՄՆ նախագահի Ազգային անվտանգության գծով օգնական Ջեք Սալիվանը՝ նշելով, որ աշխատում են երկարաժամկետ լուծման ուղղությամբ ինչպես Գազայի, այնպես էլ Հորդանան գետի Արևմտյան ափի համար:
Նրա խոսքով՝ ԱՄՆ-ն կարծում է, որ Գազան և Արևմտյան ափը քաղաքական տեսակետից պետք է միավորվեն Պաղեստինի նորացված ազգային վարչակազմի ներքո։
«Սրանք այն տարրերն են, որոնք մենք կարծում ենք, որ անհրաժեշտ են ներկայիս ճգնաժամի, ներկայիս հակամարտությունը լուծելու և նաև ավելի կայուն ապագա ապահովելու համար և՛ իսրայելցիների, և՛ պաղեստինցիների համար», – ընդգծել է Սալիվանը:
Միևնույն ժամանակ, նա հաստատել է, որ Իսրայելի վարչապետ Բենիամին Նեթանյահուի հետ կքննարկի Գազայի հատվածի վրա Իսրայելի պաշտպանության բանակի գրեթե անժամկետ վերահսկողության մասին վերջին հայտարարությունները:
«Սա կարելի է տարբեր կերպ մեկնաբանել», – ասել է Սպիտակ տան ներկայացուցիչը: Սպասվում է, որ այս շաբաթվա վերջին նա կայցելի Իսրայել:
