Ճապոնիայի ընդդիմությունը խորհրդարան է ներկայացրել կառավարությանն անվստահություն հայտնելու բանաձևի նախագիծ
Ճապոնիայի Սահմանադրական-դեմոկրատական կուսակցությունը (ՍԴԿ), որը երկրի առաջատար ընդդիմադիր ուժն է, այսօր խորհրդարանի ստորին պալատի քննարկմանն է ներկայացրել վարչապետ Ֆումիո Կիսիդայի կառավարությանն անվստահություն հայտնելու բանաձևի նախագիծ։ Ինչպես տեղեկանում ենք ТАСС գործակալությունից, այդ մասին հաղորդել է երկրի Ազգային հանրային հեռուստատեսությունը։
Հեռուստատեսության տվյալներով` ՍԴԿ-ն Կիսիդային մեղադրում է, մասնավորապես, երկրում գների բարձրացման դեմ պայքարի ոչ բավարար միջոցների մեջ։
Իշխող Լիբերալ-դեմոկրատական կուսակցությունը դաշնակիցների հետ մեծամասնություն ունի ստորին պալատում և արդեն օրվա ընթացքում մտադիր է լիագումար նիստում մերժել այդ նախագիծը։ Կառավարությանն անվստահության քվե հայտնելու օգտին են հանդես եկել նաև Ճապոնիայի Կոմունիստական կուսակցությունից խորհրդարանի պատգամավորները։ Մնացած ընդդիմադիր ուժերն այն չեն պաշտպանել։
Ճապոնիայի կառավարությունն ավելի վաղ սպառնացել էր ի պատասխան անվստահություն բանաձևի նախագծի ներկայացման վաղաժամկետ արձակել ստորին պալատը և նշանակել արտահերթ ընտրություններ։ Սակայն Կիսիդան առայժմ հրաժարվել է այդ ծրագրից:
