«Նոտարիատի ուղին ճիշտ է ընտրված». Հրայր Թովմասյան
Բարեփոխվող նոտարական համակարգում դրական տեղաշարժեր կան, դրանք անհրաժեշտ են, բայց ոչ բավարար: Այդ մասին «Փաստինֆո»-ի թղթակցին այսօր հայտնել է ՀՀ արդարադատության նախարար Հրայր Թովմասյանը:
«Դեռևս վաղ է խոսել այն նոտարիատի մասին, որը մենք պատկերացնում ենք, այդ ամբողջը պետք է թղթին տրվի, հետո կյանքի կոչվի: Չեմ կարող ասել ո՞ր փուլում է գտնվում, բայց ընթացքի մեջ է այդ ամբողջը»,- ասել է նա:
Թովմասյանն ընդգծել է, որ «մենք միգուցե դանդաղ քայլերով, միգուցե այդ ամբողջը դեռևս հասարակության լայն շրջանակներին տեսանելի չէ, բայց որ ճանապարհն, ուղին ճիշտ ընտրված է, կարծում եմ, միանշանակ է»:
Նա գտնում է, որ այս հարցում նոր հեծանիվ հորինելու անհրաժեշտություն չկա, մարդկությունը ստեղծել է լատինական նոտարիատի համակարգ, որն ունի իր սկզբունքներն ու կայունության երաշխիքները:
«Ես պետք է իմանամ, որ գնում եմ նոտարի մոտ, բնականաբար՝ վճարում եմ նոտարին, որովհետև ամբողջ աշխարհում նոտարները լավագույն իրավաբաններն են, միաժամանակ ստանում եմ երաշխիք, որ ես խաբված չեմ լինելու, գումարները չեն կորելու»,- ասել է նա:
Հ. Թովմասյանը կարևորել է էլեկտրոնային նոտարիատի համակարգի ներդրումը: Նախարարն օրերս է վերադարձել Էստոնիայից, որտեղ պետական մարմինների ծառայությունների 99 տոկոսը մատուցվում է էլեկտրոնային եղանակով: «Այս համակարգին պետք է այսպես, թե այնպես անդրադառնանք, որովհետև դրանք մի կողմից էականորեն կրճատելու են կոռուպցիոն ռիսկերը, մյուս կողմից՝ թեթևացնելու պետական մարմինների, քաղաքացիների հոգսը»,- ասել է ՀՀ արդարադատության նախարարը:
