«Ռեալն» Ազարի հետ հոգեբանական աշխատանք է կատարում
Մադրիդի «Ռեալը» կօգնի թիմի կիսապաշտպան Էդեն Ազարին հաղթահարել նախորդ մրցաշրջանում իր առջև ծառացած դժվարությունները:
Ըստ Ok Diario-ի, Մադրիդի «Ռեալի» գլխավոր մարզիչ Զինեդին Զիդանն անհատական ծրագիր է մշակել բելգիացու համար: Ակումբը չի ցանկանում շտապել և մտադիր է թույլ տալ կիսապաշտպանին վերադառնալ իր մարզավիճակին՝ նախքան նրա խաղադաշտ դուրս գալը։
Մադրիդի «Ռեալը» անձնական մարզիչ է վարձել Ազարի համար: Բացի այդ, ֆուտբոլիստի հետ հոգեբանական աշխատանքներ կիրականացվեն՝ նոր վնասվածք ստանալու հարցում վախից ազատելու համար:
Բացառվում է, որ Ազարը Լա Լիգայի 2-րդ տուրում խաղա «Սոսյեդադի» հետ: Ակումբը պատրաստ է խաղացողին տրամադրել այնքան ժամանակ, որքան նրան անհրաժեշտ է: Մադրիդի «Ռեալի» առաջնահերթությունն Ազարի լավագույն տարբերակի վերադարձն է, ուստի ակումբը պատրաստ է սպասել:
Անցած մրցաշրջանում ֆուտբոլիստը 16 հանդիպում է անցկացրել Լա Լիգայում, դարձել 1 գոլի և 6 գոլային փոխանցման հեղինակ: Նա մեկ մրցաշրջանում երեք վնասվածք է ստացել, երկուսը՝ լուրջ:
Սիրարփի Աղաբաբյան