Որտե՞ղ է դատարանի վճիռը, Կառավարությունն ո՞վ է, որ իրեն նման իրավասություն վերապահի. Հովհաննես Ավետիսյան

Հովհաննես Ավետիսյանը ֆեյսբուքյան իր էջում գրում է. «Մեր կառավարությունն ու նրա ղեկավարը հետզհետե դուրս են գալիս օրինականության և օրենսդրությամբ իրենց տրված իրավասությունների սահմաններում գործելու տրամաբանությունից: Սրա հետևանքները կարծում եմ բարդ չէ հասկանալ` ինչի են հանգեցնելու: Ես չգիտեմ, թե նման հայտարարություններն արդյոք խորությամբ գիտակցված են, թե ոչ, բայց այն իրավական պետությունը, որը բոլորս ենք ուզում, այս կարգի գրառումները ապագայում հանցագործության մեջ մասնակից լինելու մասին ինքնախոստովանանք է դիտարկելու (գրության մեջ նշված դերակատարների մասին է խոսքը` վարչապետ և կառավարություն, այլ ոչ գրառում անողի):

Իսկ եթե ավելի պարզ, ապա գրառման մեջ հետևյալ մտքերը, պնդումները, հայտարարություններն ու տեսակետները ամբողջովին դուրս են Կառավարությանը սահմանադրությամբ և օրենքներով վերապահված լիազորությունների շրջանակից:

Խնդրահարույց ձևակերպումներն են:

Պատրաստակամություն են հայտնել վերադարձնել իրենց թալանածը և վերականգնել պետությանը պատճառած վնասը:

Հարցեր: Որտե՞ղ է ինքնախոստովանանքը թալանի մեջ ներգրավվելու, որտե՞ղ է դատարանի մեղադրական վճիռը, որտե՞ղ է վճռի մաս կազմող և գնահատված պետությանը պատճառած վնասի չափը:

Ոչ մի անհատ, այդ թվում Նիկոլ Փաշինյանը իրավունք չունի պետության անունից պետությանը պատճառված վնասի չափ որոշել, դրա համար կան օրենսդրությամբ սահմանված ընթացակարգեր:

Կառավարության ունեցած տվյալներով Խաչատրյանները ղեկավարել են կոռուպցիոն և մաֆիոզ համակարգ:

Հարցեր: Եթե այս տվյալները հավաստի են, ինչո՞ւ չկա դատարանի վճիռ, որով Խաչատրանն ու որդիները կրում են իրենց օրինական պատիժը, իսկ պետությանն ու հանրությանը պատճառված վնասները դատարանի վճռով փոխհատուցվել են և դատարանի վճռով է նրանց պատկանող ունեցվածքը պետականացվել:

Բաժնեմասի վաճառքը հնարավոր կլինի, եթե վաճառքի դիմաց ստացվող գումարը ամբողջովին փոխանցվի ՀՀ պետական բյուջե:

Հարցեր: Վերոնշյալ միևնույն դիտարկումները. որտե՞ղ է դատարանի վճիռը, Կառավարությունն ո՞վ է, որ իրեն նման իրավասություն վերապահի, այսինքն՝ որոշի անձը իր մասնավոր սեփականությունը կարող է օտարել, թե ոչ:

Վարչապետը ակնկալում է, որ իրավապահները պատշաճ քննության կենթարկեն նաև Սերժ Սարգսյանի ընտանիքի ղեկավարած կոռուպցիոն համակարգը:

Հարցեր: Վարչապետը ակնկալո՞ւմ է… դուք լո՞ւրջ եք խոսում: Իսկ ինչու վարչապետի ղեկավարած քաղաքական թիմը չի ձևավորում այնպիսի իրավապահ համակարգ, որ ոչ թե ակնկալեն, այլ իրավապահներից հստակ գործողություններ տեսնենք:

Նիկոլ Փաշինյանը և իր ղեկավարած կառավարությունը արդեն հատել է անհեթեթի բոլոր սահմանները: Նրանք շարունակում են գործել ընդդիմադրի կերպարի մեջ` առանց գիտակցելու, որ հիմա իշխանության կրող են և պետք է գործեն ու խոսեն օրենսդրությամբ իրենց վերապահված իրավասության սահմաններում և պատասխանատվություն ստանձնեն, ոչ միայն իրենց արածների և չարածների համար, այլ նաև հայտարարությունների:

Եթե ձեր ունեցած տվյլաները, ինչի մասին այստեղ ասվում է, հավաստի են և փաստական, ինչո՞ւ Սերժ Սարգսյանը ձերբակալված չէ: Ինչո՞ւ նրա, ձեր ձևակերպմամբ, ղեկավարած կոռուպցիոն համակարգի պատասխանատուները ձերբակալված չեն և ինչո՞ւ նրանց ղեկավարած ՀՀԿ անվամբ կառույցի գործունեությունը դադարեցված չէ:

Բավական է մեզ հիմարի տեղ դնեք և թատրոն խաղաք: Կամ լռեք, կամ էլ փաստերով և օրենքի շրջանակում գործեք և կատարեք տված խոստումները: Այլապես, դուք էլ եք միանալու դրանց շարքին, ձեր կողմից թվարկված հանցագործություններին տեղյակ լինելու, և արդարադատություն գործելու փոխարեն ինքնագործունեությամբ զբաղվելու, ինքնադատաստան կիրառելու, իսկ ավելի շուտ` ԱՆԳՈՐԾՈՒԹՅԱՆ համար»: