ՀՀ-ն դեսպանություն կհիմնի Եթովպիայի Դաշնային Ժողովրդավարական Հանրապետությունում
ՀՀ-ն դեսպանություն կհիմնի Եթովպիայի Դաշնային Ժողովրդավարական Հանրապետությունում: Այս մասին որոշում այսօր ընդունվեց կառավարության նիստում:
ԱԳ նախարար Զոհրաբ Մնացականյանը նշեց, որ Ադիս Աբեբան աֆրիկյան մայրցամաքի քաղաքական հիմնական կենտրոններից մեկն է, այստեղ է տեղակայված Աֆրիկյան Միության կենտրոնակայանը, իսկ Աֆրիկյան Միությանն անդամակցում են աֆրիկյան մայրցամաքի բոլոր պետություններն առանց բացառության, և Ադիս Աբեբայում ՀՀ դիվանագիտական ներկայացուցչության ստեղծումը զգալիորեն կկարգավորի և կակտիվացնի ՀՀ շփումներն անդրսահարյան աֆրիկյան պետությունների հետ թե՛ հնարավոր տնտեսական հեռանկարների, թե՛ տարբեր միջազգային հարթակներում մայրցամաքի 50-ից ավելի պետությունների և դրանց աջակցությունը ստանալու տեսանկյունից։
«Մենք այս փուլին հասանք մեր հետևողական աշխատանքի շնորհիվ»,- ասաց նախարարը:
Բարձր տեխնոլոգիական արդյունաբերության նախարար Հակոբ Արշակյանը նշեց, որ Աֆրիկյան մայրցամաքում բավականին լուրջ շուկաներ և պոտենցիալ կա, մասնավորապես՝ տեխնոլոգիական ոլորտում: Նա կարևորեց նաև Քենիայի հետ վիզայի դյուրացման խնդիրը:
Զ.Մնացականյանը նշեց, որ այլ ուղղություններով ընդլայնվելու ծրագրեր, կան Ադիս Աբեբան առաջին քայլն է:
