Դեսպան Կարմիրշալյանն իր հավատարմագրերը հանձնեց Իսպանիայի թագավորին

Սեպտեմբերի 5-ին Իսպանիայի Թագավորությունում Հայաստանի Հանրապետության դեսպան Վլադիմիր Կարմիրշալյանն իր հավատարմագրերը հանձնեց Իսպանիայի թագավոր Ֆելիպե 6-րդին: Այս մասին հայտնեցին ՀՀ ԱԳՆ-ից։

Հավատարմագրերի հանձնման հանդիսավոր արարողությանը հաջորդած առանձնազրույցի ընթացքում Ֆելիպե 6-րդը շնորհավորեց դեսպան Կարմիրշալյանին հավատարմագրերի հանձնման կապակցությամբ՝ մաղթելով արդյունավետ աշխատանք։ Իսպանիայի թագավորը հույս հայտնեց, որ դեսպանն իր գործունեությամբ կնպաստի հայ-իսպանական հարաբերություններում առկա մեծ ներուժի իրացմանը։ Ֆելիպե 6-րդը հույս հայտնեց, որ Հայաստանում տեղի ունեցած վերջին քաղաքական իրադարձություններն իրենց դրական ազդեցությունը կունենան նաև հայ-իսպանական երկկողմ հարաբերությունների հետագա ամրապնդման և ընդլայնման վրա:Առանձնազրույցին ներկա էր նաև Իսպանիայի արտաքին գործերի, ԵՄ և համագործակցության նախարարի պաշտոնակատար Ժոզեպ Բոռելը (Josep Borrell):

Զրույցի ընթացքում անդրադարձ կատարվեց երկկողմ օրակարգին առնչվող մի շարք հարցերի։