««Սասնա ծռեր» կուսակցության գրանցման հարցերն արդեն լուծվել են. մասնակցելու ենք ընտրություններին». Վարուժան Ավետիսյան
«Սասնա ծռերին» ծայրահեղական հատված է ձայն տալու, ընտրությունները ցույց կտան, թե հասարակության քանի տոկոսն է ծայրահեղ տրամադրված»,- լրագրողների հետ հանդիպման ժամանակ նման տեսակետ հայտնեց քաղտեխնոլոգ Կարեն Քոչարյանը:
Լեզվաբան, քաղաքական վերլուծաբան Նարինե Դիլբարյանն էլ նկատեց.
«Ամեն հասարակության մեջ կա արմատական, հարձակողական նպատակներ ունեցող շերտ: Խնդիրն այն է, թե Հայաստանում այն որքան է: Դեռ գաղափարական դաշտն էլ հստակ չէ: Երևի ժամանակ է պետք, որ կուսակցական, գաղափարական միավոր դառնան: Այս էտապում դժվար է բացառել նրանց՝ խորհրդարանում հայտնվելը: Հեղափոխությանը մասնակցած զանգված կա, որ նրանց կողմնակիցն է, ու հիմա դժգոհ են այսօր կատարվող տարբեր իրողություններից: Եթե կարողանա դիրքավորվել, կերևա՝ կհայտնվե՞ն ԱԺ-ում, թե՞ ոչ»:
Ինչ վերաբերում է լուրերին, թե «Երկիր Ծիրանի» կուսակցության նախագահ Զարուհի Փոստանջյանը կարող է լինել «Սասնա ծռեր» կուսակցության ցուցակի առաջին եռյակում, Կարեն Քոչարյանը նշեց.
«Չեմ կարծում, որ կուժեղացնի կուսակցությանը: Նա ցույց տվեց, որ անգամ իր կուսակցությունում է կոնֆլիկտային: Ոչ մի տեղ չի կարողանում յոլլա գնալ, ո՞վ ասաց, որ «Սասնա ծռերի» հետ յոլլա կգնա»:
«Սասնա ծռերի» անդամ Վարուժան Ավետիսյանը 168.am-ի հետ զրույցում խոսելով իրենց գաղափարական դաշտի հստակության մասին՝ ասաց.
«Եզրակացրել եք, որ մեր գաղափարները հստակ չեն, հիմա ես էլ պետք է պատասխանեմ, որ այդպես է, ու խոստանում ենք հստակեցնե՞լ: Ում համար գաղափարները հասկանալի չեն, թող դիմի՝ կբացատրենք»:
Անդրադառնալով տեղեկությանը, թե «Երկիր Ծիրանի» կուսակցության նախագահ Զարուհի Փոստանջյանի հետ միասին են մասնակցելու ընտրություններին, Վարուժան Ավետիսյանը պատասխանեց.
«Որևէ մեկին միանալու հարց հատուկ չի քննարկվել»:
Վարուժան Ավետիսյանը տեղեկացրեց նաև, որ «Սասնա ծռեր» կուսակցության գրանցման հարցերն արդեն լուծվել են, նրանք մասնակցելու են ընտրություններին:
Անի Կարապետյան
