Չինաստանն ուշադրություն է դարձրել «Սարմատի» փորձարկման մասին հաղորդագրություններին․ ԱԳՆ
Պեկինում ուշադրություն են դարձրել «Սարմատ» հրթիռային համալիրի հաջող փորձարկման մասին հաղորդագրություններին։ Ճեպազրույցի ժամանակ այսօր այս մասին հայտարարել է Չինաստանի ԱԳՆ պաշտոնական ներկայացուցիչ Գո Ծյակունը:
Մայիսի 12-ին Ռազմավարական նշանակության հրթիռային զորքերի հրամանատար Սերգեյ Կարակաևը ՌԴ նախագահ Վլադիմիր Պուտինին զեկուցել էր «Սարմատ» հրթիռային համալիրի հաջող փորձնական արձակման մասին: Ռուսաստանի առաջնորդը նշել էր, որ «Սարմատ» հրթիռի պարամետրերը հնարավորություն են տալիս հաղթահարել հակահրթիռային պաշտպանության բոլոր գոյություն ունեցող և հեռանկարային համակարգերը:
«Մենք ուշադրություն ենք դարձրել համապատասխան հաղորդագրություններին», – ասել է դիվանագետը՝ պատասխանելով «Սարմատ» համալիրի փորձարկումը մեկնաբանելու մասին ՌԻԱ Նովոստիի խնդրանքին:
Մայիսի 13-ին ՌԴ նախագահի մամուլի քարտուղար Դմիտրի Պեսկովը հայտարարել էր, որ Ռուսաստանը դեռևս պաշտոնական արձագանք չի ստացել ԱՄՆ-ի կողմից «Սարմատի» փորձարկումների վերաբերյալ: Միևնույն ժամանակ, նրա խոսքով, Ռուսաստանը տեղեկացնում է «Սարմատի» նման հրթիռների արձակումների մասին՝ միջազգային պրակտիկային խիստ համապատասխան:
