Իսպանիայում հանտավիրուսի երկու նոր դեպք է հայտնաբերվել

Առողջապահության ոլորտի մասնագետները փորձում են կանխել հանտավիրուսի հնարավոր տարածումը Իսպանիայում, քանի որ ուրբաթ օրը հիվանդության կասկածով երկու նոր դեպք է գրանցվել այն շքեղ զբոսանավից հեռու, որտեղ սկսվել էր բռնկումը, հայտնում է Reuters-ը:

Վերջին տվյալներով՝ հիվանդացածներից մեկը տղամարդ է, ում ինքնազգացողությունը վատացել է նավից իջնելուց հետո, մյուսը՝ մի կին, որը վատացել է ինքնաթիռում վարակված ուղևորի կողքին նստելուց հետո:

Այս դեպքերը, որոնք արձանագրվել են միմյանցից հազարավոր մղոններ հեռու գտնվող վայրերում՝ մեկը Իսպանիայում, մյուսը՝ Հարավային Ատլանտյան օվկիանոսի հեռավոր Տրիստան դա Կունյա կղզում, չեն ներառվել Առողջապահության համաշխարհային կազմակերպության նախնական տվյալների մեջ: Ըստ ԱՀԿ-ի՝ հոլանդական դրոշի ներքո նավարկող «MV Hondius» զբոսանավում վարակվել էր ութ մարդ։

Նրանցից երեքը մահացել են։

Ուրբաթ օրը ԱՀԿ ներկայացուցիչները հայտնել են, որ ութ ենթադրյալ դեպքերից վեցում հաստատվել է հանտավիրուսը՝ պոտենցիալ մահացու հիվանդություն, որը սովորաբար փոխանցվում է կրծողների միջոցով:

Նավից հեռու հայտնված նոր դեպքերի մասին հաղորդագրությունները մտահոգություն են առաջացրել վիրուսի ավելի լայն տարածման վերաբերյալ, թեև ԱՀԿ պաշտոնյաները բազմիցս նշել են, որ բնակչության համար ընդհանուր ռիսկը ցածր է, և վիրուսը հեշտությամբ չի փոխանցվում։ «Այս բռնկման դինամիկայից, այն բանից, թե ինչպես է այն տարածվում և չի տարածվում նավի վրա գտնվող մարդկանց ու ափ իջած մարդկանց միջև, մենք շարունակում ենք գնահատել, որ ընդհանուր բնակչության համար ռիսկը ցածր է», – ասել է ԱՀԿ-ի վիրուսային սպառնալիքների տեխնիկական պատասխանատու Աննայիս Լեգանդը:

Հետազոտությունները ցույց են տվել, որ «Hondius» նավի վրա արձանագրված բռնկումը (իր տեսակի մեջ առաջինը նավի վրա) պայմանավորված է Անդյան վիրուսով։ Ըստ ԱՀԿ-ի՝ սա հանտավիրուսի միակ հայտնի տեսակն է, որն ընդունակ է մարդուց մարդուն փոխանցվել սերտ և տևական շփման դեպքում։ ՄԱԿ-ի առողջապահական կառույցի գնահատականներով՝ ԱՄՆ-ում վարակվածների շրջանում մահացության մակարդակը հասնում է 50%-ի։ Երբ ԱՀԿ-ն կիրակի օրն առաջին անգամ հայտնել է ուղևորների շրջանում շնչառական ծանր հիվանդությունների բռնկման մասին՝ նավի վրա եղել է 147 ուղևոր և անձնակազմի անդամ։

Այդ ընթացքում ևս 34 ուղևոր արդեն լքել էր նավը, որը մարտին դուրս էր եկել Արգենտինայից, կանգառներ կատարել Անտարկտիդայում ու այլ վայրերում, ապա ուղղություն վերցրել դեպի հյուսիս՝ Աֆրիկայի արևմուտքում գտնվող Կաբո Վերդեի ջրեր։

Ուրբաթ օրվա դրությամբ չորս պացիենտ է հոսպիտալացվել Հարավաֆրիկյան Հանրապետությունում, Նիդերլանդներում և Շվեյցարիայում։ Կրուիզային օպերատորը՝ «Oceanwide»-ը, հինգշաբթի օրը հայտնել է, որ նավի վրա այլևս չկան մարդիկ, որոնց մոտ առկա են հնարավոր վարակի ախտանշաններ։