«Georgian Airways» ավիաընկերությանը սնանկացում է սպառնում
«Georgian Airways» ավիաընկերությունը կրճատում է չվերթները և չի բացառում սնանկացումը, եթե իրավիճակը չբարելավվի։ Այս մասին հայտնում է Грузия Online-ը։
Ընկերությունը նաև հայտարարում է, որ ակնկալում է կառավարության աջակցությունը։
Ավիաընկերությունը սկսել է թռիչքների օպտիմալացումը՝ ավիավառելիքի գների կտրուկ աճի պատճառով։
Ընկերության ներկայացուցչի վկայությամբ, իրավիճակն արդեն օրհասական է. կրճատվում են պակաս ծանրաբեռնված ուղղություններով չվերթները, իսկ վնասներն աճում են։
«Այս ռեժիմով պայմանականորեն կարելի է իրականացնել ևս 100 չվերթ, բայց 101-րդը կարող է և չկայանալ։ Եթե իրավիճակը չփոխվի, ավիաընկերությունը կարող է սնանկանալ»,- BMG-ին հայտնել են Georgian Airways-ից։
Ավիաընկերությունը խորհրդակցություններ է անցկացնում կառավարության հետ և հույս ունի, որ դա թույլ կտա շարունակել աշխատանքը բնականոն հունով։
