Վրաստանի «Աշխատանքային միգրացիայի մասին» օրենքում փոփոխություն է կատարվել
Որոշ դեպքերում օտարերկրացիներին իրավունք կտրվի Վրաստանում իրականացնել մասնագիտական գործունեություն՝ առանց կացության և աշխատանքային գործունեության թույլտվության։ «Վրացական երազանք»-ն ընդունել է «Աշխատանքային միգրացիայի մասին» օրենքում փոփոխությունը։ Այս մասին գրում է aliq.ge-ն։
Արագացված կարգով քննարկված օրինագծի համաձայն՝ «Աշխատանքային միգրացիայի մասին» Վրաստանի օրենքի գործողությունը չի տարածվի այն հարաբերությունների վրա, որոնք կապված են օտարերկրացու՝ Վրաստանում աշխատանքի տեղավորման և նրա վճարովի աշխատանքային/ձեռնարկատիրական գործունեության իրականացման հետ, եթե նա Վրաստանի կառավարության անդամի գրավոր նախաձեռնության հիման վրա տրված գործող հատուկ կացության թույլտվություն ունեցող անձ է։
Վրաստանում իրականացվում է կառավարության որոշմամբ սահմանված կարճաժամկետ մասնագիտական գործունեություն, և Վրաստանի օրենսդրությամբ այլ բան նախատեսված չէ. գործունեություն է իրականացվում հանրային հաստատության կամ պետության բաժնեմասնակցությամբ հիմնադրված ձեռնարկության օգտին. աշխատանքային գործունեությունն ամբողջությամբ իրականացվում է հեռավար կարգով տեղական գործատուի համար, և այդ գործունեությունը չի պահանջում նրա մուտքը Վրաստանի տարածք. աշխատանքային գործունեությունը/ծառայությունների մատուցումն իրականացվում է ոչ ռեզիդենտ անձի օգտին, և աշխատանքային գործունեությունը/ծառայությունների մատուցումը կապված է Վրաստանի սահմաններից դուրս ոչ ռեզիդենտ անձի գործունեության իրականացման հետ:
«Աշխատանքային միգրացիայի մասին» Վրաստանի օրենքում ավելացել է նաև նոր նորմ, որի համաձայն՝ օտարերկրացին իրավունք կունենա Վրաստանում իրականացնել կարճաժամկետ մասնագիտական գործունեություն՝ առանց աշխատանքային գործունեության իրավունքի և համապատասխան կացության թույլտվության, եթե նշված գործունեությունն իրականացվում է ժամանակավոր այցի շրջանակներում, երկարատև զբաղվածություն չէ տեղական աշխատաշուկայում և կապված է կոնկրետ կարճաժամկետ նախագծի, միջոցառման կամ ծառայության հետ:
