Պատերազմը կա՛մ հիմա կկանգնեցնեն, կա՛մ այն կձգվի. Իրանը դրան պատրաստ է. Լանա Ռավանդի-Ֆադային

168TV-ի «Թրիգեր» հաղորդաշարի հյուրն Արևելյան մշակութային կենտրոնի ղեկավար և ՌԴ ԳԱԱ Արևելագիտության ինստիտուտի ավագ գիտաշխատող Լանա Ռավանդի-Ֆադային է:

Զրույցի ընթացքում մանրամասն քննարկվել են Իրանի շուրջ իրավիճակի սրմամբ պայմանավորված առանցքային աշխարհաքաղաքական գործընթացները: Փորձագետը վերլուծել է Իսրայելի և ԱՄՆ-ի նպատակները ներկայիս առճակատման մեջ, ինչպես նաև գնահատել իրադարձությունների զարգացումն այս պահին:

Առանձնահատուկ ուշադրություն է դարձվել Մոջթաբա Խամենեիի կերպարին, Իրանի ներքաղաքական դինամիկայի հնարավոր փոփոխություններին, ինչպես նաև նոր գերագույն առաջնորդից ունեցած սպասումներին:

Քննարկման շրջանակներում անդրադարձ է կատարվել նաև TRIPP նախագծին և դրա արդիականությանը սկսված հակամարտության պայմաններում: Զրույցի կարևոր մաս է կազմել տարածաշրջանային անվտանգությունը, մասնավորապես՝ հնարավոր ռիսկերը Հայաստանի և Ադրբեջանի համար՝ Հայաստանում ԱՄՆ-ի և Ադրբեջանում Իսրայելի ուժեղացված ներկայության ֆոնին:

Փորձագետը դիտարկել է Իրանի տարածքում հնարավոր ցամաքային գործողության սցենարները, ինչպես նաև վերլուծել է Թուրքիայի դերը՝ Իրանի հնարավոր թուլացման և տարածաշրջանում թուրքական դիրքերի հզորացման համատեքստում:

Բացի այդ, հարցազրույցի ընթացքում գնահատվել են Ռուսաստանի գործողությունները և դրա ներգրավվածության հետ կապված հետագա հնարավոր ռիսկերը: Քննարկման առանձին բլոկ է դարձել հակամարտության կրոնական գործոնը, ներառյալ՝ ամերիկյան զինվորականների կրոնական պատրաստության մասին հայտարարությունները և տեղի ունեցողի մեկնաբանությունը հնարավոր «նոր Արմագեդոնի» պրիզմայով:

Հայկ Դերզյան