Համատեղությամբ աշխատողներից առողջության ապահովագրության համար կրկնակի գանձում է արվում
Այսօր ԱԺ տնտեսական հարցերի հանձնաժողովի հերթական նիստի ժամանակ«Հայաստան» խմբակցության անդամ Թադևոս Ավետիսյանն ասաց, որ համատեղությամբ աշխատող քաղաքացիների առողջության համընդհանուր պարտադիր ապահովագրության համար կրկնակի գանձում է արվում։ Նա նշեց, որ տևական ժամանակն է՝ կապի մեջ է առողջապահության նախարարության գործընկերների հետ, նրանց տեղեկացնում է այդ մասին, արագ արձագանքում են, բայց հարցը գործնականում չի լուծվում։
«Քաղաքացու համար որքան կարևոր են հարկերը, դրանից ոչ պակաս կարևոր է, որ իր գրպանից պետությունն ավելի գումար չտանի՝ թեկուզ խոստանալով, որ հետո ինչ-որ ձևով հետ կվճարի։ Չպիտի պետությունը 2 անգամ նույն ծառայության դիմաց ժողովրդին հարկի կամ գումար գանձի։ Այսօր ես փաստում եմ նաև իմ օրինակով, որ նման հնարավորություն չկա»,- ասաց Ավետիսյանը։
Նա նշեց, որ հարցը քննարկել է ոլորտի մասնագետների հետ, մի մասը չի էլ պատկերացնում, թե հարցն ինչպես պետք է կարգավորել։ Այս պահի դրությամբ լուծումներ չկան։
«Մի՛ գանձեք կրկնակի, ոչ էլ խոստացեք, որ հետո հետ կվերադարձվի՝ անորոշ հեռանկարով, երբ դուք էլ չեք պատկերացնում, թե դա ինչպես պետք է արվի»,- ասաց պատգամավորը։
Նրա կարծիքով՝ սա շատ վտանգավոր է, քանի որ կարող է բացասական վերաբերմունք և անվստահություն ստեղծել համակարգի նկատմամբ։
Նիստին ներկա ՀՀ պետական եկամուտների կոմիտեի նախագահի տեղակալ Համլետ Սահակյանը նշեց՝ թեպետ պատգամավորը ճիշտ է՝ այս պահին դեռևս գործնական լուծումը ներդրված չէ, բայց օրենսդրական կարգավորումն ու մեխանիզմը կա։
«Որքան ես տեղյակ եմ՝ առաջիկա օրերին համապատասխան որոշումները կընդունվեն, և հետվերադարձ կլինի մեկ անգամ դիմումով, ինչպես այսօր գործում է կուտակային սոցիալական վճարի համար»,- նշեց նա։
Համլետ Սահակյանի խոսքով՝ քաղաքացին առաջին անգամ դիմում ներկայացնելիս հաշվեհամար է տրամադրում, եթե հետագայում կրկին կրկնակի գանձում արվի, վերադարձն ավտոմատ կլինի։
