ՊԵՏՈՒԹՅՈՒՆԸ ԼՎԱՆՈՒՄ Է ՁԵՌՔԵՐԸ. ՕՊՏԻՄԱԼԱՑՆՈՒՄ ԵՆ ԱՆԳԱՄ ՎՏԱՆԳԱՎՈՐ ՀԻՎԱՆԴՈՒԹՅՈՒՆՆԵՐԸ. ԱՆՈՒՇ ՊՈՂՈՍՅԱՆ

2026 թվականի հունվարի 3-ից շտապօգնության մի շարք կանչեր ամբողջությամբ փոխանցվելու են Առողջության առաջնային պահպանման (ԱԱՊ) ծառայությանը` որպես Առողջության առաջնային պահպանման ծառայություններ մատուցող բժշկական կազմակերպություններին ուղղորդվող կանչեր, որոնք ենթակա են սպասարկման մինչև 120 րոպեի ընթացքում (եթե կանչը փոխանցվում է հերթապահության ավարտին, սպասարկվում է հաջորդ աշխատանքային օրվա առաջին ժամերին)։

Այս մասին 168TV-ի «Առողջ որոշում» հաղորդաշարի ժամանակ ասաց «Առողջության իրավունք» հասարակական կազմակերպության նախագահ Անուշ Պողոսյանը:

Այս անգամ նա խոսել է Հայաստանի առողջապահական համակարգի հերթական «նորամուծության» մասին, այս անգամ արդեն՝ շտապ բուժօգնության ծառայությանը վերաբերող:

«ԱԱՊ-ին են փոխանցվելու հետևյալ կանչերը․

Մինչև 38.5°C ջերմություն, առանց կյանքին կամ առողջությանը վտանգ սպառնացող ախտանիշների
Հարբուխ, ռինիտ, տոնզիլիտ
Առանց կլինիկական արտահայտված ախտանիշների զարկերակային գերճնշում (>140/90)
Քրոնիկական հոդացավեր և մկանացավեր
Քրոնիկական ալկոհոլիզմով կամ այլ քրոնիկական հիվանդություններով անձանց կրկնակի կանչեր նույն օրը, առանց սրացման
Նորագոյացություններով հիվանդների կրկնակի կանչեր, առանց նոր սրացած ախտանիշների
Նույն հասցեից, նույն պատճառով 24 ժամվա ընթացքում կրկնակի կանչ, եթե առաջին կանչի ժամանակ անհետաձգելի վիճակ չի արձանագրվել
Նույն հասցեից 24 ժամվա ընթացքում կրկնակի կանչ, եթե պացիենտը հրաժարվել է հոսպիտալացումից»,- ասաց Անուշ Պողոսյանը:

Նրա խոսքով՝ այս ամենը բժիշկների աշխատավարձի վրա որևէ կերպ չի անդրադառնալու։

«Առողջապահության նախարարությունը ապահովագրված քաղաքացիներին առաջարկում է էնդովասկուլյար վիրաբուժություն մինչև 78 տարեկանը։ Էնդովասկուլյար (անոթների ներսից իրականացվող ինվազիվ) վիրաբուժությունը կիրառվում է հետևյալ դեպքերում․

Վերջույթների պերիֆերիկ զարկերակային հիվանդություն
Աթերոսկլերոզ, անոթների նեղացումներ և խցանումներ
Անևրիզմներ (աորտայի, պերիֆերիկ)
Սուր և քրոնիկ թրոմբոզներ
Կրիտիկական իշեմիա
Վարիկոզ հիվանդություն (լազերային կամ ռադիոհաճախային մեթոդներով)
Վիսցերալ անոթների հիվանդություններ (երիկամային, միջընդերային)
Արյունահոսությունների կառավարում
Որոշ ուռուցքների սնուցող անոթների էմբոլիզացիա:

Սակայն գործող կարգավորումների համաձայն՝ այս կենսական նշանակություն ունեցող բժշկական միջամտությունները ապահովագրության շրջանակում նախատեսված են միայն մինչև 78 տարեկան անձանց համար»,- նկատեց Անուշ Պողոսյանը:

Վերջինս հավելեց՝ այսպիսով, ՀՀ-ում ավելի քան 100․000 քաղաքացի, ովքեր 78 տարեկանից բարձր են, զրկվում են անոթների ինվազիվ վիրահատություններն ապահովագրությամբ իրականացնելու հնարավորությունից՝ անկախ բժշկական ցուցումներից, ռիսկից կամ կյանքի պահպանման անհրաժեշտությունից։

«Փաստացի տարիքային չափանիշը դառնում է ոչ թե բժշկական, այլ բացառող գործոն, և պետությունը տարեց քաղաքացիներին առաջարկում է այլընտրանքային, փաստացի սահմանափակող ապահովագրական մոտեցում։ Սա առողջապահական քաղաքականություն չէ, այլ տարիքային խտրականություն, որը հակասում է՝ ինչպես առողջության իրավունքի տրամաբանությանը, այնպես էլ՝ համընդհանուր ապահովագրության գաղափարին»,- ասաց առողջապահության ոլորտի փորձագետը:

Ըստ նրա՝ Առողջապահության նախարարությունը օպտիմալացնում է ամեն ինչ՝ նույնիսկ վտանգավոր հիվանդությունները: 34-ից 9 Հայաստանի Հանրապետությունում երկար տարիներ շրջապատի համար վտանգ ներկայացնող հիվանդություններ։

«Սրանք այն վարակիչ հիվանդություններն են, որոնք կարող են արագ տարածվել՝ առաջացնելով համաճարակային վտանգ և պահանջելով պետության անմիջական, պարտադիր և համակարգային միջամտություն։ Այս հիվանդությունների դեպքում պետությունն ունի հստակ սահմանված գործառույթներ։

Պետության անելիքը շրջապատի համար վտանգ ներկայացնող հիվանդությունների դեպքում՝

1․ Վարակիչ հիվանդությունների վաղ հայտնաբերում և պարտադիր գրանցում

2․ Յուրաքանչյուր դեպքի օպերատիվ համաճարակաբանական հետազոտություն 3․ Վարակված անձանց մեկուսացում և բուժման կազմակերպում պետական պատվերի շրջանակներում

4․ Կոնտակտավոր անձանց հայտնաբերում, հսկողություն և կարանտին 5․ Պետական պատվաստումների իրականացում և օջախներում լրացուցիչ իմունիզացիա

6․ Անվճար կամ պետական պատվերով բուժօգնության կազմակերպում 7․ Ինֆեկցիոն ծառայությունների և լաբորատոր կարողությունների ապահովում 8․ Սանիտարահիգիենիկ վերահսկողություն՝ հանրային վայրերում, սննդի և ջրի ոլորտում

9․ Հանրային իրազեկում և պաշտոնական հաղորդակցություն

10․ Պարտադիր ցուցումների տրամադրում բժշկական և ոչ բժշկական կազմակերպություններին

11․ Համաճարակային իրավիճակում ժամանակավոր սահմանափակումների կիրառում

12․ Բուժանձնակազմի պաշտպանություն և ապահովում անհրաժեշտ միջոցներով 13․ Պետական պահուստների ձևավորում (դեղեր, պաշտպանիչ միջոցներ) 14․ Իրավական վերահսկողություն և պատասխանատվության կիրառում խախտումների դեպքում

15․ Միջգերատեսչական համակարգված աշխատանք (ԱՆ, ՏԻՄ, ոստիկանություն, կրթական կառույցներ): Սակայն այսօր հայտարարվում է, որ այս հիվանդությունների ցանկը կտրուկ կրճատվում է, և այսուհետ հատուկ վտանգավոր կհամարվեն ընդամենը 9 հիվանդություններ։

Եվ այո, այս իրավիճակում կարելի է միայն մեկ բան ասել․ պետությունը բառացիորեն «ձեռները լվանում է»»,- եզրափակեց Անուշ Պողոսյանը:

Մանրամասները՝ տեսանյութում:

Բաժանորդագրվեք յութուբյան մեր ալիքին https://www.youtube.com/@168amofficial, գրեք ձեր հարցերը ձեզ հուզող խնդիրների մասին: