«Եթե Կառավարությունն ինքն է, ուրեմն՝ ինքն էլ անձնապես պատասխանատու է պատերազմի ու դրա հետևանքների համար. կառավարությունում ուղղակի անթասիբ մարդիկ են նստած». Աննա Կոստանյան

Այսօր Կառավարության հերթական նիստից հետո լրագրողների հետ ճեպազրույցում Նիկոլ Փաշինյանը հայտարարեց՝ «Կառավարությունը ես եմ»։

Երբ լրագրողներից մեկը նրան հարց ուղղեց ՀԷՑ-ի հետ կապված միջազգային արբիտրաժային դատարանի կայացրած որոշման վերաբերյալ, որն ընդունել է նաև Կառավարությունը, Նիկոլ Փաշինյանը զայրացած հարցրեց, թե ո՞վ է ասում, որ Կառավարությունը դատարանի որոշումն ընդունել է։

«Կառավարությունից ով դիրքորոշում հայտնել է, թող դիմում գրի գնա, բացարձակապես նման դիրքորոշում չի կարող լինել։ Կառավարությունը ես եմ, որևէ մեկը չի կարող իմ դիրքորոշմանը հակասող դիրքորոշում ունենալ, ընդհանրապես, եթե Կառավարությունում մարդիկ կան, որոնք իմ դիրքորոշմանը հակասող դիրքորոշում ունեն, հենց հիմա թող դիմում գրեն ու շենքերից դուրս գան, եթե՝ ոչ, ապա ես ինքս նրանց կհանեմ»,- սպառնաց Նիկոլ Փաշինյանը։

ԱԺ նախկին պատգամավոր Աննա Կոստանյանը Նիկոլ Փաշինյանի այս հայտարությունը համարում է դասական բռնապետի հայտարարություն։

«Եթե Կառավարությունն ինքն է, ուրեմն՝ ինքն էլ անձնապես պատասխանատու է պատերազմի ու դրա հետևանքների համար, որովհետև ինքն է կառավարել, պատերազմը տեղի է ունեցել իր օրոք։ Եթե նման հայտարարություն է անում, ուրեմն՝ պատերազմի թիվ մեկ պատասխանատուն ու մեղավորն ինքն է։ Իհարկե, ժողովրդավարության մասին այս դեպքում բացարձակապես չի կարելի խոսել ու ընդհանրապես նույնիսկ հեգնանքով ասել, շատ ծիծաղելի ձևակերպում է, թե Հայաստանը «ժողովրդավարության բաստիոն» է»,- 168.am-ի հետ զրույցում նշեց Աննա Կոստանյանը։

Հարցին՝ Նիկոլ Փաշինյանի այս հայտարարությանն արդյո՞ք չպետք է հետևեր Կառավարության տարբեր անդամների հրաժարականը, Աննա Կոստանյանը պատասխանեց՝ փաստացի նրանք չունեն արժանապատվություն։

«2020 թվականից այս կողմ պետական ապարատի ցանկացած ծառայող և առհասարակ ՔՊ-ից որևէ անդամ բավականին ու բավարար ժամանակ ուներ դուրս գալու, եթե մտածում էր, որ Փաշինյանը հակահայկական օրակարգ է առաջ քաշում։ Եթե չեն արել, նշանակում է, որ սպասարկում են հենց նրա շահը։ Եթե այդ մարդը բացահայտ, ի լուր իր թիմի ասում է, որ չկա մեկը, որ իր հետ չհամաձայնի, ապա ինչի՞ մասին է խոսքը։ Այնտեղ ուղղակի անթասիբ մարդիկ են նստած։ Սա արժեհամակարգային ինդիկատոր է»,- հավելեց Աննա Կոստանյանը։

Մեր զրուցակցի բնորոշմամբ՝ Նիկոլ Փաշինյանն ապացուցել է, որ Հայաստանում ժողովրդավարությունը վաղուց թաղված է, դրա վառ ապացույցը բազմաթիվ քաղբանտարկյալներն են, ովքեր համարձակվել են ձեռնոց նետել իրեն՝ ընդդեմ կարծիք արտահայտել կամ գործել իր վարած քաղաքական օրակարգին հակառակ։ Հետևաբար՝ Հայաստանում ժողովրդավարություն չկա, այն սին ու մտացածին մի քող է, որով փորձում են ոչ թե արդեն հայ ժողովրդին, այլ արտաքին աշխարհին խաբել։ Հայաստանում ժողովրդավարություն վաղուց արդեն չկա։

«Ժողովրդավարության տրամաբանության մեջ քաղաքացիներն ամեն օր իրենց առօրեական կյանքում չէին բախվի 21-րդ դարին ոչ հարիր խնդիրներին, ամենատարբեր շերտերի ու ամենատարբեր ոլորտներին առնչվող՝ սկսած տրանսպորտային ենթակառուցվածքներից, վերջացրած գյուղատնտեսությամբ, որն այսօր փաստացի Հայաստանում չկա։

Հիմա որքան էլ մեզ փորձում են համոզել, որ օգոստոսի 8-ին Վաշինգտոնում ամերիկյան վկայությամբ կամ ներկայությամբ կնքված համաձայնագիրը երաշխիք է ՀՀ անվտանգության, բոլոր սթափ մարդիկ հասկանում են, որ դա այդպես չէ։ Ադրբեջանի բռնակալը բազմիցս ապացուցել է, որ այն պահին, որտեղ իր պետության շահը կթելադրի, որպեսզի ՀՀ նկատմամբ սանձազերծի պատերազմ, առանց հապղելու կգնա այդ քայլին, հաշվի չառնելով վաշինգտոնյան փաստաթուղթը»,- ընդգծեց Աննա Կոստանյանը։

Այս համատեքստում նա հիշեցրեց, որ այսօր ադրբեջանական օկուպացիայի տակ կան հայկական տարածքներ, որնց մասին չեն խոսում, և Նիկոլ Փաշինյանի թելադրած խաղաղության օրակարգը փակել է այդ տարածքները դեօկուպացնելու հնարավորությունը։