Պենտագոնը ոչ հրապարակավ արգելում է Ուկրաինային օգտագործել ATACMS-ը Ռուսաստանի տարածքին հարվածելու համար
Պենտագոնը ոչ հրապարակային կարգով արգելում է Ուկրաինային օգտագործել ամերիկյան մեծ հեռահարության բանակային մարտավարական հրթիռային համալիրները (ATACMS) Ռուսաստանի տարածքում գտնվող թիրախներին հարվածներ հասցնելու համար՝ սահմանափակելով Կիևի՝ այդ զենքը Մոսկվայի ներխուժումից պաշտպանվելու համար կիրառելու հնարավորությունները, հայտնում է The Wall Street Journal-ը՝ հղում անելով ամերիկացի պաշտոնյաներին։
Մինչ Սպիտակ տունը փորձում էր համոզել Ռուսաստանի նախագահ Վլադիմիր Պուտինին միանալ խաղաղ բանակցություններին, Պենտագոնում մեկնարկած համաձայնեցման գործընթացը Ուկրաինային հետ է պահում ռուսաստանյան տարածքի խորքին հարվածներ հասցնելուց, գրում է պարբերականը։
ԱՄՆ պաշտպանության նախարար Փիթ Հեգսեթը հեռահար զենքի կիրառման հարցում վերջին խոսքի իրավունքն ունի, ընդգծում է The Wall Street Journal-ը։
Այս լուրը հայտնվել է այն բանից հետո, երբ ԱՄՆ նախագահ Դոնալդ Թրամփը հրապարակավ էլ ավելի մեծ հիասթափություն է հայտնել երեք տարի տևող պատերազմի և Ռուսաստանի ու Ուկրաինայի միջև խաղաղության համաձայնագիր կնքելու իր անկարողության պատճառով։
Այն բանից հետո, երբ Ռուսաստանի նախագահ Վլադիմիր Պուտինի հետ նրա գագաթնաժողովը և եվրոպացի առաջնորդների ու Ուկրաինայի նախագահ Վլադիմիր Զելենսկու հետ հաջորդած հանդիպումը նկատելի առաջընթացի չեն հանգեցրել, ուրբաթ օրը Թրամփը հայտարարել է, որ կրկին դիտարկում է Ռուսաստանի դեմ տնտեսական պատժամիջոցներ սահմանելու կամ, որպես այլընտրանք, խաղաղ գործընթացից դուրս գալու հնարավորությունը։
