Վրաստանում ձերբակալվել է անօրինական 13 միգրանտ
Վրաստանի Միգրացիոն դեպարտամենտը ձերբակալել է 13 անօրինական միգրանտի, ըստ aliq.ge-ի՝ այս մասին հայտնել է Ներքին գործերի նախարարությունը։
Նախարարության հաղորդմամբ՝ անօրինական միգրացիայի դեմ պայքարի շրջանակներում Ներքին գործերի նախարարության միգրացիոն դեպարտամենտի աշխատակիցներն իրականացրել են ներգաղթի հատուկ վերահսկողության միջոցառում։
«Ստացված տեղեկատվության հիման վրա, միջոցառման շրջանակներում, դեպարտամենտի աշխատակիցներն ստուգել են կոնկրետ վայրեր. նպատակը Վրաստանում առանց օրինական հիմքի գտնվող օտարերկրյա քաղաքացիների նույնականացումն էր։
Համալիր միջոցառման արդյունքում ձերբակալվել է օտարերկրյա 13 քաղաքացի։ Նրանց թվում են Հորդանանի, Եգիպտոսի, Պակիստանի, Հնդկաստանի և Թուրքիայի քաղաքացիներ։
Պարզվել է, որ նրանք երկրում են գտնվել «Օտարերկրացիների և քաղաքացիություն չունեցող անձանց իրավական կարգավիճակի մասին» Վրաստանի օրենքով սահմանված պահանջների խախտմամբ»,- ասված է դեպարտամենտի հայտարարության մեջ։
Ներկայումս վերոնշյալ անձինք տեղավորված են Միգրացիոն դեպարտամենտի ժամանակավոր բնակության կենտրոնում։ Համապատասխան ընթացակարգեր են իրականացվում նրանց երկրից վտարելու համար։
